काठमाडौं (हाम्रो खेलकुद) – नेपाली क्रिकेट जगतको बुधबार ऐतिहासिक क्षणको साक्षी बन्नेछ । बुधबारदेखि आईसीसी विश्वकप लिग-२ अन्तर्गत पहिलो त्रिकोणात्मक सिरिजमा नेपालले ओमान र अमेरिकासँग घरेलु मैदानमा प्रतिस्पर्धा गर्दै सुरुवात गर्नेछ ।

बुधबार विहान राष्ट्रिय क्रिकेट टोलीका कप्तान ज्ञानेन्द्र मल्ल र ओमानका कप्तान जीशान मकसूद टसको लागि टीयू मैदान छिर्ने छन् । ज्ञानेन्द्र र जीशान टसमा सामेल भएलगत्तै टीयू मैदानले औपचारिक रुपमा ओडीआई मान्यता पाउने छ । त्योसँगै टीयू ओडीआई मान्यता पाउने विश्वकै २ सय ९ औं क्रिकेट मैदान बन्ने छ ।

विश्वका ओडीआई मान्यता पाउने क्रिकेट मैदानको सुचिमा अब नेपालको टीयू मैदान पनि समावेश रहने छ । टीयूले २२ वर्षपछि ओडीआई मान्यता पाउन लागेको हो । टीयूमा पहिलो अन्तर्राष्ट्रिय खेल सन् १९९८ अक्टोबर ३ देखी १३ सम्म एसीसी ट्रफी भएको थियो । उक्त प्रतियोगिताको उपाधि बंगलादेशले मलेसियालाई ८ विकेटले हराउँदै जितेको थियो ।

सबै भन्दा पहिलो पटक ओडीआई मान्यता अस्ट्रेलियाको मेलबर्न क्रिकेट मैदानले सन् १९७१ जनवरी ५ मा पाएको थियो । त्यसयता २ सय ७ मैदानले ओडीआई मान्यता पाएका छन् । पछिल्लो समय जनवरी ५ मा ओमानको अल आमेरत क्रिकेट स्टेडियमले ओडीआई मान्यता पाएको थियो । विश्वमा सबै भन्दा बढि ओडीआई मैदान छिमेकी मुलुक भारतमा छन् । भारतमा ४९ क्रिकेट मैदानले ओडीआई मान्यता पाएका छन् । इंग्ल्यान्डका २०, अस्ट्रेलिया १९, न्युजिल्यान्ड र पाकिस्तानका १६-१६ मैदानले ओडीआई मान्यता पाएका छन् ।

सन् २०१८ मार्च १५ मा नेपालले पहिलो पटक ओडीआई मान्यता पाएको थियो । मलेसियाको दुई मैदानले ओडीआई मान्यता पाएका छन् । सन् २००६ मा किनरारा एकेडेमीले ओभलले ओडीआई मान्यता पाउने १ सय ६१ औं मैदान बनेको थियो । सन् २०१४ मा बायोमास ओभल १ सय ९१ औं ओडीआई मान्यता पाउने मैदान बनेको थियो ।

टीयूले ओडीआई मान्यता पाउदा पुर्व कप्तान पारस खड्का पनि धेरै खुसी छन् । पारसले आफ्नो पहिला देखिकै सपना पूरा हुन लागेको बताउँछन् । ‘घरेलु मैदानमा ओडीआई खेल खेल्ने पहिला देखिको इच्छा थियो । मैदानले पनि ओडीआई मान्यता पाउने छ । हाम्रो देशको लागि पनि ठूलो कुरा हो । आगामी दिनमा कीर्तिपुर मात्रै होइन अन्य मैदानले पनि ओडीआई मान्यता पाउन्,’ पारसले हाम्रो खेलकुदसँग भने ।

नेपालले ६ ओडीआई खेलेको छ । हालसम्म सबै खेल सबै विदेशी भुमिमा खेलिएको थियो । त्यसमध्य चार यूएई र दुई खेल नेदरल्यान्डसँग खेलेको छ । जसमा नेपालले नेदरल्यान्डसँग १ र यूएईसँग २ खेलमा जित निकालेको छ । ऐतिहासिक पहिलो घरेलु ओडीआई खेलमा नेपालले बलियो टोली ओमानलाई हराउँदै आईसीसी विश्वकप लिग २ मा सुखद सुरुवात गर्ने सोच हुने छ ।