एजेन्सी – अन्तर्राष्ट्रिय क्रिकेट परिषद (आईसीसी) को नयाँ टि ट्वान्टी वरियतामा पुर्व कप्तान पारस खड्का र लेग स्पिनर सन्दीप लामिछाने खस्कँदा तीब्र गतिका बलर करण केसीले सुधार गरेका छन् ।

आईसीसीले सोमवार सार्वजनिक गरेको नयाँ टि ट्वान्टी वरियतामा पारस ब्याटिङतर्फ खस्किएर ६२ औं स्थानमा पुगेका छन् । बलिङतर्फ सन्दीप पनि खस्किदै ८५ औं स्थानमा पुगेका छन् ।

बलिङतर्फ तीब्र गतिका बलर सोमपाल कामी, करण केसी, अभिनास बोहरा र स्पिनर वसन्त रेग्मी शीर्ष एक सय भित्र छैनन् । अलराउन्डरतर्फ करणले सुधार गरेका छन् । नयाँ वरियतामा अलराउन्डरतर्फ करण ७५ स्थानमा उक्लिएका छन् । सोमपाल ६५ र पारस खड्का २७ औं स्थानमा छन् ।

यता भारतीय ओपनर लोकेश राहुलले आफ्नो करियरकै उत्कृष्ट वरियतामा आएका छन् । राहुलले ४ स्थान फड्को मार्दै दोस्रो स्थानमा उक्लिएका छन् । पहिलो स्थानमा पाकिस्तानका कप्तान बाबर आजम यथावत छन् । भारतीय ओपनर रोहित शर्माले ३ स्थान सुधार गर्दै शीर्ष दशमा उक्लिएका छन् । न्युजिल्यान्डका कप्तान केन विलियम्सनले एकै पटक ७ स्थान सुधार गर्दै १६ औं स्थानमा रहेका छन् । न्युजिल्यान्डकै विकेटकिपर टिम सेफर्टले एकै पटक ४३ स्थान फड्को मार्दै ३४ औं स्थानमा उक्लिएका छन् ।

बलिङ तर्फ अफगानिस्तानका स्पिनर राशिद खानै शीर्ष स्थानमा यथावत छन् । भारतीय तीब्र गतिका बलर जस्प्रित बुमराहले एकै पटक २६ स्थान फड्को मार्दै ११ औं स्थानमा उक्लिएका छन् । अलराउन्डरतर्फ अफगानिस्तानका अलराउन्डर मोहम्मद नाबीनै शीर्ष स्थानमा छन् । टि ट्वान्टी नयाँ वरियतामा नेपाल १२ औं स्थानमा यथावत छ ।