काठमाडौं (हाम्रो खेलकुद) – श्रीलंकाका पूर्वकप्तान तथा विकेटकिपर उपुल थरंगाले एभरेष्ट प्रिमियर लिग (इपिएल) मा आफुमा भएको क्रिकेट ज्ञान नेपाली युवा क्रिकेटरलाई बाँड्न तयार रहेको बताएका छन् ।

ज्ञानेन्द्र मल्ल कप्तान रहेको साविक विजेता ललितपुर प्याट्रीयट्समा अनुबन्ध भएपछि थरंगाले यस्तो बताएका हुन् । ‘२०२० इपिएलमा ललितपुर परिवारको एक सदस्य हुन पाएकोमा गौरव महसुस गरेको छु । बढ्दो क्रिकेट संस्कृतिको हिस्सा हुन पाउँदा खुसी छु र आगामी वर्षहरूमा पनि सामेल हुन चाहन्छु’, उनले भने, ‘ त्यसभन्दा बढी नेपालको सुन्दरता हेर्न आतुर छु । नेपाली युवा पुस्तालाई मेरो क्रिकेट ज्ञान बाँड्नेछु ।’

थरंगासँग ३१ टेष्ट, २ सय ३५ ओडीआई र २६ टि ट्वान्टीको अनुभव छ । ललितपुरमा राष्ट्रिय टोलीका कप्तान ज्ञानेन्द्रसँगै ललित नारायण राजवंशी, पवन सरार्फ, राशिद खान, सन्दीप जोरा, सूर्य तामाङ, शंकर राना लगातका युवा खेलाडी छन् । ललितपुर प्रतियोगिताको साविक विजेता पनि हो ।

आगामी संस्करणको इपिएलमा ठूला नाम गरेका खेलाडी आउने क्रम जारी छ । हालसम्म वेस्ट इन्डिजका ओपनर क्रिस गेल, वेस्ट इन्डिजकै अलराउन्डर ड्वेन स्मिथ, आयरल्यान्डका केभीन ओ ब्रायन, अफगानिस्तानका ओपनर मोहम्मद शाहजादले इपिएल खेल्ने पक्का भएको छ । दक्षिण अफ्रीकाका ब्याट्सम्यान हसीम अमला, जिम्बावेका अलराउन्डर सिकन्दर राजा, इंग्ल्यान्डका तीब्र गतिका बलर लियाम प्लान्केट, श्रीलंकाका जीवन मेन्डिस लगातका ठूला नाम गरेका खेलाडीको पनि संभावना बलियो छ ।