काठमाडौं (हाम्रो खेलकुद) – वाईवाई ग्रेट हिमालय क्रिकेट एकेडेमी (जिएचसिए) ले ललितपुरस्थित हात्तीवनमा आधुनिक आवसिय सेवा सुविधा सहितको एकेडेमी सञ्चालनमा लिएको छ ।

आवासीय भवनसहित ४ रोपनी जग्गामा फैलिएको एकेडेमीको शुक्रबार एक कार्यक्रममाझ उद्घाटन भएको हो । सन् २०१३ देखी संचालनमा आएको जिएचसिएले शान्तिनगरस्थित एकडेमीबाट प्रशिक्षण दिँदै आएको थियो । अव जिएचसिएले शान्तिनगर र हात्तिबन दुबैबाट प्रशिक्षण गराउने छ । हात्तिबन प्रमुख र शान्तिगर शाखाका रुपमा रहने छ ।

१ करोड ५० लाख खर्चमा बनेको उक्त नयाँ एकेडेमी ४ रोपनी जग्गामा फैलिएको छ । जहाँ एकै पटक १ सय ५० जनाले प्रशिक्षण गर्न सक्ने छन् । २० जना क्षमताको आवास पनि रहेको छ । नयाँ इन्डोर सहितको एकेडेमीमा सिनियर र जुनियर दुवैको लागि फरक प्रशिक्षणको व्यवस्था रहनेछ । बलिङ मेशिनबाट पनि प्रशिक्षण गर्न मिल्ने छ । पानीको समयमा पनि प्रशिक्षण गर्न मिल्ने इन्डोर संरचना निर्माण गरिएको जिएचसिएले बनाएको छ । एकेडेमीमा क्रिकेटसँगै फुटसलको पनि व्यवस्था रहेको छ । एकेडेमीमा प्रतिभावान युवा खेलाडीलाई विशेष छुट हुने जनाइएको छ ।

जिएचसिएले नेपाललाई ऐतिहासिक वान डे मान्यता दिलाउँदाका प्रशिक्षक जगत टमटालाई प्रमुख प्रशिक्षकको रुपमा नियुक्त गरेको छ । प्रशिक्षक टमटाले एकेडेमीले आगमी दिनमा नेपाली क्रिकेट विकासमा टेवा पुग्ने बताए । खेलाडीको लागि सुरुवाती चरण निकै महत्वपूर्ण हुँदा जिएचसिए जस्ता एकेडेमीको महत्व निकै हुने बताए ।

कार्यक्रममा ग्रेट हिमालय क्रिकेट एकेडेमीले चितवनमा धुर्मुस सुन्तली फाउण्डेसनले निर्माण गर्न लागेको गौतम बुद्ध अन्तर्राष्टिय क्रिकेट रंगशालालाई १ लाख सहयोग गर्ने भएको छ । एकेडेमीका अध्यक्ष सुदीप शर्माले उद्धघाटन कार्यक्रममा फाउण्डेसनका सचिव पुरुषोत्तम हुमागाईलाई १ लाखको डमी चेक हस्तान्तरण गरे ।

जिएचसिएका अध्यक्ष सुदीप शर्माले नेपाली क्रिकेटको ग्रास रुट बलियो बनाउँदै नेपाली क्रिकेटमा राम्रा खेलाडी उत्पादन गर्ने लक्ष्य राखेको बताए । ‘यसअघि वर्षाको समयमा हाम्रो प्रशिक्षण थिएन । अब वर्षाले प्रशिक्षण प्रभावित हुने छैन । विदेश भ्रमणमा जादा हामीले जुन एकेडेमी देखेका थियौं, त्यस्तै सेवा सुविधा भएको हामी बनाएका हौं,’ शर्माले भने ।

सन् २०१३ देखी सञ्चालनमा आएको यस वाई वाई ग्रेट हिमालय क्रिकेट एकेडेमीबाट हालसम्म नेपाली सिनियर टोलीका युवा ओपनर ईशान पाण्डे, यू१९ टोलीका स्पिनर सागर ढकाल, अभिषेक बस्नेत, हिमान्शु दत्त, प्रकाश विष्ट, विवेक कुमार यादव, यू १६ का प्रशान्त सिंह, विशाल पटेल, दिपक बोहरा जस्ता खेलाडी उत्पादन गरि सकेको छ । जिएचसिएले बंगलादेश, भारत, यूएई जस्ता देशमा वैदेशिक अनुभवका लागि खेलाडीलाई भ्रमण समेत गराउने गर्दै आएको छ ।