एजेन्सी – बायाँ हाते स्पिनर रकीबुल हसनले उत्कृष्ट बलिङ गरेपछि बंगलादेश दक्षिण अफ्रिकामा जारी यू१९ विश्वकपको सेमिफाइनलमा प्रवेश गरेको छ ।

बंगलादेशले घरेलु टोली दक्षिण अफ्रिकालाई १ सय ४ रनको फराकिलो अन्तरले पराजित गर्दै सेमिफाइनलमा स्थान पक्का गरेको हो । बंगलादेशले प्रस्तुत गरेको २ सय ६२ रनको विजयी लक्ष्य पछ्याएको घरेलु टोली दक्षिण अफ्रिका ४२.३ ओभरमा १ सय ५७ रनमा अल आउट भयो । दक्षिण अफ्रिका ल्यूक ब्यूफोर्टले ९१ बलमा ६ चौका सहित सर्वाधिक ६० रनको योगदान दिए ।

ओपनर जोनाथन बर्डले ३९ बलमा ४ चौका र १ छक्का सहित ३५, ज्याक लेस १९ र खन्ना कोटानीले १५ रन बनाए । बंगलादेशको कसिलो स्पिन बलिङ सामु दक्षिण अफ्रिकाका ७ खेलाडीले दोहोरो अंकमा रन छुन सकेनन् ।

बंगलादेशका स्पिनर रकीबुल हसनले ९.३ ओभरमा १९ रन खर्चेर ५ विकेट लिदै प्लेयर अफ द म्याच चुनिए । तन्जीम हसन सकीब २, शमिम हसन र शोरफुल इस्लामको नाममा १-१ विकेट रह्यो ।

त्यसअघि टस हारेर ब्याटिङ थालेको बंगलादेशले निर्धारित ५० ओभरमा ५ विकेट गुमाउँदै २ सय ६१ रन बनाएको थियो । तन्जिद हसनले ८४ बलमा १२ चौकाको सहयोगमा सर्वाधिक ८० रन बनाए । शहादत हुसेन ७६ बलमा ७ चौका र १ छक्का सहित ७४ रनमा अविजित रहे । तौहीद हिरदेय ५१ रनमा आउट भए । दक्षिण अफ्रिका फेको मोलत्सेनले २ विकेट लिए ।

पहिलो क्वाटरफाइनल खेलमा भारतले अस्ट्रेलियालाई ७४ रन र दोस्रो क्वाटरफाइनलमा बुधबार न्युजिल्यान्डले वेस्ट इन्डिजलाई २ विकेटले हराउँदै सेमिफाइनलमा प्रवेश गरेको थियो । शुक्रबार समूह ‘डी’ को विजेता अफगानिस्तानले समूह ‘सी’ को उप विजेता पाकिस्तानसँग प्रतिस्पर्धा गर्ने छ । जसको विजेताले पहिलो सेमिफाइनलमा भारतसँग प्रतिस्पर्धा गर्ने छ । दोस्रो सेमिफाइनलमा बंगलादेश र न्युजिल्यान्ड भिड्ने छन् । फाइनल माघ २९ मा हुने छ ।