विनोदबाबु रिजाल , चितवन

पहिलो संस्करणको सिएमसी चितवन प्रिमियर लीग (सिपिएल) टि ट्वान्टी क्रिकेट प्रतियोगिता शुक्रबार सुरु हुँदैछ । सिपिएलको सबै तयारी पूरा भएको आयोजक नारायणी एडभर्टाइजिङ एण्ड इभेन्ट्सले जनाएको छ ।

प्रतियोगिताको ट्रफी बिहीबार अपराह्न नारायणी नदी किनारमा सार्वजनिक गरिएको छ । प्रतियोगितामा सहभागी पाँच वटै टिमका कप्तान संघर्ष पौडेल (भरतपुर गुर्खाज), सन्तोष न्यौपाने (सौराहा स्याण्ड्स), आकास थापा (राप्ती ¥यापिड्स), दीपेश श्रेष्ठ (इच्छाकामना वारीयर्स) र हेमराज पौडेल (उपकप्तान–माडी टाइगर्स) ले ट्रफी सार्वजनिक गरेका हुन् ।

नारायणगढको क्याम्पाचौर सिपिएल खेलका लागि तयार भएको छ । प्रतियोगिताको राष्ट्रिय खेलकुद परिषद्का सदस्य सचिव रमेशकुमार सिलवालले उदटन गर्नेछन् । माघ २५ गते सम्म चल्ने प्रतियोगिताको विजेताले उपाधिसहित २ लाख र दोस्रो हुने टोलीले १ लाख रुपैयाँ प्राप्त गर्नेछ ।

प्रतियोगिताको उद्घाटन खेलमा शुक्रबार राइट एण्ड एसोसिएट भरतपुर गुर्खाजविरुद्ध इच्छाकामना वारियर्स मैदान उत्रँदैछ । यो खेलमध्यान्ह १२ बजे हुने आयोजक नारायणी एडर्भटाइजिङ एण्ड इभेन्ट्सका प्रबन्ध निर्देशक राजु चौधरीले जानकारी दिए । प्रतियोगितामा सहभागी टिमले दुई जना राष्ट्रिय खेलाडी (अन्डर १९) अनिवार्य र तीनजना स्थानीय खेलाडी अनिवार्य राख्नुपर्नेछ ।