काठमाडौं (हाम्रो खेलकुद) – राष्ट्रिय क्रिकेट टोलीका प्रमुख ब्याट्सम्यान तथा पुर्व कप्तान पारस खड्काले आईसीसी विश्वकप लिग-२ मा घरेलु मैदानमा अर्को साता देखी सुरु हुने त्रिकोणात्मक सिरिजमा ओमान र अमेरिकालाई हराउन उत्कृष्ट क्रिकेट खेल्नुपर्ने बताएका छन् ।

अभ्यासको क्रममा टियु क्रिकेट मैदानमा ब्यस्त पारसले हाम्रो खेलकुदसँगको कुराकानीमा यस्तो बताएका हुन् । ‘खेलाडीले अभ्यासदेखि सबै कुरामा आफ्नो शत प्रतिशत दिँदै आएका छन् । अब मिहिनेत प्रतियोगिता र खेलमा देखाउनुपर्छ । खेलमा हामी कस्तो क्रिकेट खेल्छौं भन्नेमा भर पर्छ’, पारसले भने, ‘ओमान र अमेरिकालाई हराउन हामीले हाम्रो तर्फबाट उत्कृष्ट क्रिकेट खेल्नै पर्छ ।’

‘घरेलु मैदानको प्रत्येक खेल किन महत्त्वपूर्ण छन् भने घरेलु मैदानको अंकको सहयोगले क्वालिफायारमा पुग्न ठूलो सहयोग पुग्छ’, पारसले भने । पारसले यो स्तरमा ब्याटिङ मात्र नभएर बलिङ र फिल्डिङ पनि त्यतिनै उत्कृष्ट हुनुपर्ने बताउँछन् ।

‘सिनियर खेलाडीले अझ बढि जिम्मेवार लिनुपर्छ, यो स्तरमा खेल्न सजिलो हुने छैन । दुई तीन जना ब्याट्सम्यान र बलर चलेर मात्र पनि हुँदैन । सबैले आफुलाई एउटा खेल विनर रुपमा कसरी प्रस्तुत हुने भन्ने सोच्ने हो भने धेरै जस्तो कुराको समाधान हुने छ’, पारसले भने ।

पारसले नेपालबाट खेल्ने सबै खेल महत्त्वपूर्ण हुने बताउछन् । ‘घरेलु मैदानमा ओडीआई खेल खेल्ने पहिला देखिको इच्छा थियो । मैदानले पनि ओडीआई मान्यता पाउने छ । हाम्रो देशको लागि पनि ठूलो कुरा हो । आगमी दिनमा कीर्तिपुर मात्रै पाएर हुँदै अन्य मैदानले पनि ओडीआई मान्यता पाउन्,’ उनले भने ।

कीर्तिपूरमा नेपाली समर्थक सामु खेल्नु उत्साहित र आतुर रहेको पारस बताउँछन् । पारसले समर्थकहरुलाई राम्रो क्रिकेट खेलर जितेर देखाउन सकौं भन्ने सोचि रहेको बताए ।

विश्वकप लिग-२ मा एक अर्का जुन सुकै टोलीले हराउन सक्ने क्षमता रहेको पारस बताउँछन् । अझ घरेलु मैदान भएको हुँदा यस ओडीआई त्रिकोणात्मक सिरिज नेपाललाई झनै महत्वपूर्ण छ । ‘हामीले २०१५-१७ विश्व च्याम्पियनसिप लिगमा केहि खेल घरेलु मैदानमा खेल्न पाएनौं, जसको असर अंक तालिकामा परेको थियो । हामीलाई आशा छ, घरेलु मैदानमा पुरा अंक ल्यान खोज्ने छौं’, पारसले भने ।