काठमाडौं (हाम्रो खेलकुद) –आगामी संस्करणको एभरेष्ट प्रिमियर लिग (इपिएल) को लागि सबै टोलीले टिममा रहने खेलाडी, फुकवा गरेका खेलाडी र टोलीमा किनेका खेलाडीको नाम सार्वजनिक गरेका छन् ।

यस पटक टि ट्वान्टी स्पेलिष्ट सिद्धान्त लोहनी फुकुवा हुँदा यू १९ का कप्तान रित गौतम देखी विकास आग्री सम्मका युवा खेलाडी फ्रेन्चाइज टोलीमा अनुबन्ध भएका छन् । शरद भेषवाकर कप्तान रहेको भैरहवा ग्याडियटर्सले विकेटकिपर प्रकाश केसी र ब्याट्सम्यान भुपेन्द्र थापा क्षेत्रीलाई फुकुवा गरेको छ ।

पछिल्लो समय यी दुई खेलाडीले घरेलु लिग खेलेका छैनन् । भैरहवाले सुदूरपश्चिम प्रदेशका तीब्र गतिका बलर विकास आग्री सँगै हिमांशु दत्तलाई टोलीमा अनुबन्ध गरेको छ । पारस खड्का कप्तान रहेको विराटनगर वारियर्सले स्पिनर अनिल खरेल, विक्रम कुमार भुषाललाई टोलीमा अनुबन्ध गरेको छ । पोखरा राइनोजले फुकुवा गरेका सौरभ खनाललाई पनि विराटनगरले टोलीमा भित्राएको छ । विराटनगरले स्पिनर विनोद लामा, अलराउन्डर पुष्प थापा र रविन क्षेत्रीलाई फुकुवा गरेको छ ।

विनोद लामा दुई हप्ता अघि सम्पन्न मन मोहन मेमोरियल एक दिवसिय खेलमा ३ खेलमा १४ विकेट लिदै प्रतियोगिताको उत्कृष्ट बलर घोषित भएका थिए । यस अघिनै दीपेन्द्र सिंह ऐरीलाई काठमाडौं पठाउँदै सोमपाल कामीलाई टोलीमा भित्रााएको चितवन टाइगर्सले युवा ब्याट्सम्यान तथा विकेटकिपर खडक बोहरालाई टोलीमा अनुबन्ध गरेको जनाएको छ । खडकले पछिल्लो समय घरेलु र यू१९ मा राम्रो प्रर्दशन गर्दै आएका छन् । चितवनले कप्तान पृथु बास्कोटालाई फुकुवा गरेको छ ।

यस अघिनै दीपेन्द्र र सन्दीप लामिछानेलाई टोलीमा भित्राएको काठमाडौं किंग्स(११ ले तीब्र गतिका बलर अमृत भट्टाई, स्पिनर शेर मल्ल र दीपेन्द्र रावतलाई टोलीमा भित्राएको छ । काठमाडौंले सिद्धान्त लोहनी, पुरन विश्वकर्मा र विक्रम कुमार भुषालालाई फुकुका गरेको छ । साविक विजेता ललितपुर प्याटियटर्सले भने सन्दीप बाहेक अन्य कुनै खेलाडी अनुबन्ध र फुकुवा गरेको छैन । सन्दीप यस अघिनै ललितपुरबाट काठमाडौं गई सकेका थिए ।

पोखरा राइनोजले यू१९ का कप्तान तथा युवा ब्याट्सम्यान रित गौतम, बिपिन रावल, पृथु बास्कोटा र यू१९ का तीब्र गतिका बलर बिवेक कुमार यादवलाई टोलीमा अनुबन्ध गरेको छ । चितवनले फुकुवा गरेको पृथुलाई पोखराले अनुबन्ध गरेको हो । शक्ति गौचनले सन्न्यास लिई सकेको हुँदा उनी टोलीमा छैनन् । पोखराले मध्यक्रमका ब्याट्सम्यान राजेश पुलामी मगर, हिटर सौरभ खनाल र विकेटकिपर सुबेन्दु पान्डेलाई फुकुवा गरेको छ ।