एजेन्सी – गत वर्ष विग ब्यास लिगमा स्पिनर सन्दीप लामिछानेले क्याप्टेन किलरको उपनाम पाएका थिए । गतवर्ष सुरुवाती ४ खेलमा ८ विकेट लिने क्रममा सन्दीपले विपक्षी चारै टोलीका कप्तानलाई आउट गर्दै अन्तर्राष्ट्रिय स्तरमा सनसनी मच्चाएका थिए ।

पहिलो पटक बिग ब्यास खेलेका सन्दीपको उक्त प्रर्दशनले धेरैको मन तानेको थियो । बिग ब्यासमा गत वर्ष सन्दीपले जति चर्चा बटुलेका थिए । यस वर्ष त्यति हुन सकेन । लिग चरणको खेल सकिँदा मेलबर्न स्टार्स शीर्ष स्थानमा रहँदै क्वालिफयारमा पुगेको छ । तर सन्दीप ओमान र अमेरिकासँग हुने त्रिकोणात्मक सिरिजको लागि सोमबार बिहान नेपाल आएका छन् ।

लिग चरणको १४ खेल मध्य सन्दीपले १३ खेल खेले । सन्दीपले सामान्य चोटका कारण एक खेलमा विश्राम गर्नु परेको थियो । मेलबर्नको पहिलो रोजाईका सन्दीपले १३ खेलमा ४५ ओभर बलिङ गर्दै ३ सय ३५ रन खर्चेर १५ विकेट लिए । लिग चरणमा सन्दीप सर्वाधिक विकेट लिने क्रममा सातौं नम्बरमा छन ।

१३ खेल मध्य सन्दीपले ३ खेलमा विकेट लिन सकेनन् । ६ खेलमा १-१ विकेट लिए । यस सिजनमा सन्दीपले एक खेलमा मात्रै ३ विकेट लिए । तीन खेलमा सन्दीपले २-२ विकेट लिए । सन्दीपले यस सिजनमा म्यान अफ द म्याच प्रर्दशन गर्न सकेनन् । सम्रगमा सन्दीपको प्रर्दशनमा एकरुपता चाहिँ रहेन ।

मेलबर्न स्टार्सले प्रमुख रोजाईको स्पिनरमा परेका सन्दीपले निराश नबनाए पनि आशा गरे अनुसारको चाहिँ प्रर्दशन गर्न सकेनन् । गत वर्ष नै बिग ब्यासको अनुभव बटुलेका मैदान र खेलाडीसँग राम्रोसँग घुलमिल भई सकेका सन्दीपले बिग ब्यासमा जुन प्रर्दशन गरे त्यो भन्दा बढि आशा समर्थक र स्टार्सले गरेको थियो ।

१३ खेलमा सन्दीपको प्रर्दशन

सन्दीपले ब्रिसबेन हिटसँग ४ ओभरमा ३८ रन खर्चिदै १ विकेट लिदै मध्यम सुरुवात गरेका थिए। दोस्रो खेलमा सन्दीपले होबार्ट हरिकेन्सविरुद्ध ३ ओभरमा १८ रन खर्चेर १ विकेट लिए । तेस्रो खेलमा सन्दीपले एडिलेड स्टाइकर्सविरुद्ध ३ ओभरमा १५ रन खर्चिदै १ विकेट लिए । हरिकेन्सविरुद्ध सन्दीपले २ ओभरमा ११ रन खर्चिदा विकेट लिन सकेनन् ।

सन्दीपले सिड्नी थन्डरसँगको खेलमा विश्राम पाएका थिए । विश्रामबाट फर्किएका सन्दीपले मेलबर्न रेनेगेड्सविरुद्ध ४ ओभरमा २६ रन खर्चेर ३ विकेट लिए । उक्त खेलमा सन्दीपले टम कपुर, डानियल क्रिश्टियन र शन मार्शलाई आउट गरेका थिए । उत्कृष्ट प्रर्दशन गरेपनि ४ खेलमा १९ रन खर्चेर २ विकेट लिएका एडम जम्पा म्यान अफ द म्याच चुनिए ।

सन्दीपले सिड्नीविरुद्ध ४ ओभरमा ३९ रन खर्चिदा विकेट लिन सकेनन् । तर मेलबर्नले सन्दीप प्रतिको विश्वास घटाएन । मेलबर्न रेनेगड्सविरुद्ध महँगो सावित भएपनि दुई विकेट लिएका थिए । उक्त खेलमा सन्दीपले ४ ओभरमा ३९ रन खर्चिएका थिए । सिड्नीविरुद्ध सन्दीपले ४ ओभरमा ३५ रन खर्चेर १ विकेट लिए ।

सन्दीपले पर्थविरुद्ध भने घातक बलिङ गर्दै ३ ओभरमा १ मेडन सहित ७ रन खर्चेर २ विकेट लिए । पुन पर्थविरुद्ध सन्दीपले ४ ओभरमा २९ रन खर्चेर १ विकेट लिए । सिड्नीविरुद्ध सन्दीपले २ विकेट लिएपनि आफ्नो रन कम गर्न सकेनन् । सन्दीपले ३ ओभर ३८ रन खर्चिए । सन्दीप एडिलेडविरुद्ध विकेटविहीन बने भने लिग चरणको अन्तिम खेलमा हिटविरुद्ध ४ ओभरमा १६ रन खर्चेर १ विकेट खर्चिदै यस संस्करणको बिग ब्यासको यात्रा सकाए । गत वर्ष सन्दीपले बिग ब्यासमा मेलबर्न स्टार्सबाट ८ खेलमा ११ विकेट लिएका थिए ।