एजेन्सी – दक्षिण अफ्रिकासँगको चार टेष्ट सिरिज इंग्ल्यान्डले ३-१ ले जितेको छ । चौथो टेष्टमा सोमबार दक्षिण अफ्रिकालाई १ सय ९१ रनको फराकिलो अन्तरले पराजित गर्दै इंग्ल्यान्डले सिरिज जितेको हो ।

इंग्ल्यान्डले पहिलो इनिङमा ४ सय रन बनाएको थियो । उसका ओपनर ज्याक क्रली ६६, डोमिनिक सिब्ली ४४, कप्तान जो रुट ५९, जो डेनली २७, ओल्ली पप ५६, क्रिस वोक्स ३२, मार्क वुड ३५ र स्टुअर्ट ब्रोडले ४३ रनको योगदान दिए । दक्षिण अफ्रिकाका एनरिच नोर्टिजले ५ विकेट लिए ।

दक्षिण अफ्रिका पहिलो इनिङमा ६८.३ ओभरमा १ सय ८३ रनमा अल आउट भएको थियो । दक्षिण अफ्रिका विकेटकिपर क्विन्टन डि कक ७६ रन बनाउन बाहेक अन्यले राम्रो प्रर्दशन गर्न सकेनन् । इंग्ल्यान्डका मार्क वुडले ५, बेन स्टोक्स र क्रिस वोक्सले २-२ विकेट लिए ।

पहिलो इनिङमा २ सय १७ रनको अग्रता लिएको इंग्ल्यान्डले दोस्रो इनिङमा २ सय ४८ रनमा अल आउट हुँदै दक्षिण अफ्रिकालाई ४ सय ६६ रनको विशाल लक्ष्य दिएको थियो । दोस्रो इनिङ मा इंग्ल्यान्डका कप्तान जो रुटले ५८, डोमिनिक सिब्ली ४४ र स्याम करनले ३५ रन जोडे । दक्षिण अफ्रिकाका बेउरन हेन्ड्रिक्सले ५ विकेट लिए ।

दोस्रो इनिङमा दक्षिण अफ्रिका ७७.१ ओभरमा २ सय ७४ रनमा अल आउट हुँदै फराकिलो हार बेहोरेको हो । दक्षिण अफ्रिकाका रस्सी भान डर दुसेनले १ सय ३८ बलमा १५ चौका र २ छक्का सहित ९८ रनमा क्याच हुँदै शतकबाट चुके । डी ककले ३९ र कप्तान फाफ डु प्लेसिसले ३५ रन जोड्न बाहेक अन्यले राम्रो प्रर्दशन गर्न सकेनन् ।

इंग्ल्यान्डका मार्क वुडले ४, बेन स्टोक्स र स्टुअर्ट ब्रोडले २-२ विकेट लिए । पहिलो खेलमा दक्षिण अफ्रिका १ सय ७ रनले विजयी भएको थियो । दोस्रो खेलमा १ सय ८९ र तेस्रो खेलमा इंग्ल्यान्ड ५३ रनले इनिङ अन्तरले विजयी भएको थियो । बेन स्टोक्स म्यान अफ द सिरिज चुनिए ।