काठमाडौं (हाम्रो खेलकुद) – नेपाली क्रिकेटमा ओपनिङ जोडी लामो समय देखी प्रमुख समस्या बन्दै आएको छ । पछिल्लो एक वर्षमा नेपालले फरक प्रतियोगितामा प्राय फरक ओपनर जोडी मैदान उतारेको छ । जसको असर ब्याटिङ क्रममा देखिएको छ । पछिल्लो तीन वर्षमा कप्तान ज्ञानेन्द्र मल्ल बाहेक अन्यलाई टिक्न मुश्किल परेको छ ।

ओमान र अमेरिकासँग माघ २२ देखि २९ सम्म हुने त्रिकोणात्मक सिरिजमा नेपालको पुनः फरक ओपनिङ जोडी मैदान उतार्दै छ । ओमान र अमेरिकासँगको त्रिकोणात्मक ओडीआई सिरिजमा कप्तान ज्ञानेन्द्र मल्ल र प्रमुख ब्याट्सम्यान पारस खड्काले ओपनिङ गर्ने निश्चित भएको छ ।

पारस र ज्ञानेन्द्रले टि ट्वान्टीमा ओपनिङ गरिसकेका छन् । गत जुलाईमा सिंगापुरमा भएको आईसीसी टि ट्वान्टी विश्वकप एसिया रिजन देखी पारस र ज्ञानेन्द्रले टि ट्वान्टीमा ओपनिङ गर्दै आएका छन् ।

‘अहिले सम्मलाई हाम्रो सोच पारस र मैले नै ओपनिङ गर्ने छ । दुवैजना अनुभवी भएको र ५० ओभरमा टिमलाई चाहिएको हुँदा उत्कृष्ट गर्ने प्रयास गर्नेछौं । टि ट्वान्टीमा गरिसकेका छौं, एकदिवसियमा पनि राम्रो गर्न चाहान्छौं । खेलका क्रममा परिवर्तन पनि हुन सक्छ’, ज्ञानेन्द्रले हाम्रो खेलकुदसँग भने ।

पारसले टि ट्वान्टीमा गत वर्ष युएईसँग भएको तीन टि ट्वान्टी सिरिज देखी ओपनिङ गर्दै आएका छन् । ज्ञानेन्द्रले सन् २०१६ अप्रिलमा कीर्तिपुरमा आईसीसी विश्व क्रिकेट लिग च्याम्पियनसिप २०१५-१७ मा नामिबिया देखि निरन्तर ओपनिङ गर्दै आएका छन् । त्यसअघि च्याम्पियनसिप अन्तर्गतनै ओपनर सुवास खकुरेल र अनिल कुमार मण्डलको जोडी रहेको थियो । नामिबियाविरुद्ध कीर्तिपुरका दुवै खेलमा नरेश बुढाएर र ज्ञानेन्द्रले ओपनिङ गरे । नामिबियाविरुद्ध पहिलो खेलमा ज्ञानेन्द्र र नरेशले ४२ र दोस्रो खेलमा २४ रनको साझेदारी गरेका थिए ।

अगष्टमा नेदरल्यान्डविरुद्ध दुबै खेलमा ज्ञानेन्द्र र अनिल कुमार मण्डलले ओपनिङ गरे । २०१७ को मार्चमा घरेलु मैदान कीर्तिपुरमा केन्यासँगको दुबै खेलमा ज्ञानेन्द्र र सुनिल धमलाले ओपनिङ गरेका थिए । सुनिल धमला पहिलो खेलमा ३ र दोस्रोमा आउट भएपछि उनको विकल्पको रुपमा सागर पुन, दिलिप नाथ, अनिल कुमार साह, प्रदीप ऐरी, सुबास खकुरेल, विनोद भण्डारी, इशान पाण्डे, कुशल भुर्तेल, हुँदै पारस सम्म आई पुगेको छ । नेपालले ६ ओडीआई खेलमा ३ फरक जोडी मैदान उतारेको छ ।

नेपालको ओडीआईमा ओपनिङ जोडी र साझेदारी

नेदरल्यान्डसँगको दुई ओडीआई सिरिज – २०१८

पहिलो खेलमा : ज्ञानेन्द्र र अनिल कुमार शाह (१२.२ ओभर ५८ रन)

दोस्रो खेलमा : ज्ञानेन्द्र र सुबास खकुरेल (७.३ ओभर, २८ रन)

२०१८ एसिया कप छनोट – २०१८

नेपाल विरुद्ध यूएई : ज्ञानेन्द्र र सुबास (०.४ ओभर, ४ रन)

यूएइसँगको तीन ओडीआई सिरिज – २०१९

पहिलो खेल : ज्ञानेन्द्र र विनोद भण्डारी (०.४ ओभर, १ रन)

दोस्रो खेल : ज्ञानेन्द्र र विनोद (१५.३ ओभर ६१ रन)

तेस्रो खेल : ज्ञानेन्द्र र विनोद (४.३ ओभर १९ रन)