एजेन्सी – पाकिस्तान क्रिकेट बोर्ड (पीसीबी) ले सेप्टेम्बरमा पाकिस्तानमा हुने टि ट्वान्टी एसिया कप प्रतियोगिता खेल्न भारत नआए आफु सन् २०२१ मा भारतमा हुने टि ट्वान्टी विश्वकप खेल्न नजाने बताएको छ । पीसीबीका प्रमुख कार्यकारी अधिकृत (सिइओ) वासिम खानले शनिबार  पत्रकार सम्मेलनमा यस्तो प्रतिकृया दिएका हुन् ।

‘भारतीय टोली एसिया कपको लागि यदी पाकिस्तान आउदैन भने हामी पनि २०२१ मा भारतमा हुने टि ट्वान्टी विश्वकप खेल्न जादैनौं’, वासिमले भने । पाकिस्तान क्रिकेट बोर्डले एसिया कप आफुलेनै गर्ने जनाएको छ । पाकिस्तानले नगर्ने भए बंगलादेशले आफु गर्न तयार रहेको बताएको थियो । तर पाकिस्तानले एसियन क्रिकेट काउन्सिलले आफुलाई गर्न अधिकार दिएको हुँदा आफुलेनै गरेरै छाड्ने बताएको छ ।

पिसिबिले भारतसँगको चिसो सम्बन्धको कारण एसिया कप युएई र पाकिस्तान दुई ठाउँमा गर्न सक्ने जनाएको छ । पाकिस्तानले सन् २००९ मा श्रीलंका खेलाडी चडेको बसमा बम आक्रामक भएदेखि यूएईलाई घरेलु मैदान बनाउदै आएको थियो । राजनितीक बिग्रिदो सम्बन्धको कारण भारत र पाकिस्तानले सन् २००७ देखी होम अवे सिरिज खेलेका छैनन् ।

धेरैले सेप्टेम्बरमा सुरक्षाको कारण भारत पाकिस्तान नजान सक्ने बताउदै आएका छन् । नेपाललाई पनि एसिया कप खेल्ने अवसर छ । फागुनमा थाईल्यान्डमा हुने इस्टर्न रिजनमा नेपाल सहित भुटान, चीन, म्यानमार, हङकङ, मलेसिया, सिंगापुर र थाईल्यान्डबीच प्रतिस्पर्धा हुने छ । शीर्ष दुई टोली एसिया टि ट्वान्टी क्वालिफयारमा पुग्ने छन् ।

अगष्टमा मलेसियामा हुने एसिया टि ट्वान्टी क्वालिफयारमा विजेता बन्न सके नेपालले एसिया कपमा भारत, पाकिस्तान, बंगलादेश, श्रीलंका र अफगानिस्तानसँग खेल्न पाउने छ । सन् २०२१ मा भारतमा हुने टि ट्वान्टी विश्वकपको लागि आईसीसीले टि ट्वान्टी वरियतामा १२ औं स्थानमा रहेको हुँदा नेपाललाई सिधैं ग्लोबल छनोटमा मौका दिएको छ ।