एजेन्सी – पाँच खेलको टि ट्वान्टी सिरिज अन्तर्गत पहिलो खेलमा भारतले घरेलु टोली न्युजिल्यान्डमाथि ६ विकेटको सानदार जित निकालेको छ ।

न्युजिल्यान्डले प्रस्तुत गरेको २ सय ४ रनको विशाल लक्ष्य भारतले १९ ओभरमा ४ विकेट गुमाउँदै पुरा गर्यो । युवा ब्याट्सम्यान श्रेयस ऐरले २९ बलमा ५ चौका र ३ छक्का सहित ५८ रनमा अविजित रहँदै भारतको जित पक्का गरे । ओपनर रोहित शर्मालाई ७ रनमा गुमाएको भारतले कप्तान विराट कोहली र लोकेश राहुलले दोस्रो विकेटका लागि ९९ रनको महत्वपूर्ण साझेदारी गर्दै जितको आधार तय गरे ।

ईश सोधीले टिम साउथीबाट क्याच गराउनु अघि राहुलले २७ बलमा ४ चौका र ३ छक्का सहित ५६ रन जोडे । त्यस्तै कप्तान विराट कोहलीले ३२ बलमा ३ चौका र १ छक्का सहित ४५ रनमा क्याच आउट भए । शिवम दुबे १३ रनमा आउट हुँदा मनिष पाण्डे १४ रनमा नट आउट रहे । न्युजिल्यान्डका स्पिनर इश सोधीले ४ ओभरमा ३६ रन खर्चेर २ विकेट लिए । ब्लेयर टिकर र मिचेल सान्टनारले १-१ विकेट लिए ।

त्यसअघि इडेन पार्कमा टस हारेर ब्याटिङ थालेको न्युजिल्यान्डले २० ओभरमा ५ विकेट गुमाउँदै २ सय ३ रन बनाएको थियो । कप्तान केन विलियम्सनले २६ बलमा ४ चौका र ४ छक्का सहित आक्रमक ५१ रनको इनिङ खेले । विलियम्सन १७ औं ओभरको अन्तिम बलमा युजभेन्द्र चहललाई ठूलो सट खेल्नेक्रममा कप्तान विराट कोहलीबाट क्याच आउट भए ।

अनुभवी ब्याट्सम्यान रस टेलर २७ बलमा ३ चौका र ३ छक्का सहित ५४ रनमा अविजित रहे । विलियम्सन र टेलरले चौथो विकेटका लागि २७ बलमा ६१ रनको साझेदारी गर्दै विशाल योगफलमा पुर्याएका थिए । ओपनर कोलिन मुनरो र मार्टिन गुप्टिलले ७।५ ओभरमा ८० रन जोड्दै उत्कृष्ट सुरुवात दिलाएका थिए । गुप्टिललाई शिवम दुबेले रोहित शर्माबाट ३० रनमा क्याच गराए । गुप्टिलले १९ बलमा ४ चौका र १ छक्का प्रहार गरे । अर्का ओपनर कोलिन मुनरो ५९ रनमा क्याच आउट भए ।

१२ औं ओभरको पाँचौ बलमा शार्दुल ठाकुरले युजभेन्द्र चहलबाट क्याच गराउनु अघि मुनरोले ४२ बलमा ६ चौका र २ छक्का प्रहार गरे । अलराउन्डर कोलिन डी ग्रान्डहोमले खाता खोल्न सकेनन् । भारतका जस्प्रित बुमराह, शार्दुल ठाकुर, रविन्द्र जडेजा, शिवम दुबे र युजभेन्द्र चहलले १-१ विकेट लिए । दोस्रो खेल आइतबार हुने छ ।