एजेन्सी – पाँच खेलको टि ट्वान्टी सिरिज अन्तर्गत पहिलो खेलमा घरेलु टोली न्युजिल्यान्डले भारतलाई २ सय ४ रनको विशाल लक्ष्य दिएको छ ।

इडेन पार्कमा टस हारेर ब्याटिङको निम्तो पाएको न्युजिल्यान्डले निर्धारित २० ओभरमा ५ विकेट गुमाउँदै २ सय ३ रन बनायो । घरेलु टोलीलाई विशाल योगफलमा पुर्याउन कप्तान केन विलियम्सनले २६ बलमा ४ चौका र ४ छक्का सहित आक्रमक ५१ रनको इनिङ खेले । विलियम्सन १७ औं ओभरको अन्तिम बलमा युजभेन्द्र चहललाई ठूलो सट खेल्नेक्रममा कप्तान विराट कोहलीबाट क्याच आउट भए ।

अनुभवी ब्याट्सम्यान रस टेलर २७ बलमा ३ चौका र ३ छक्का सहित ५४ रनमा अविजित रहे । विलियम्सन र टेलरले चौथो विकेटका लागि २७ बलमा ६१ रनको साझेदारी गर्दै बलियो योगफलमा पुर्याए ।

न्युजिल्यान्डलाई ओपनर कोलिन मुनरो र मार्टिन गुप्टिलले ७.५ ओभरमा ८० रन जोड्दै उत्कृष्ट सुरुवात दिलाएका थिए । गुप्टिललाई शिवम दुबेले रोहित शर्माबाट ३० रनमा क्याच गराए । गुप्टिलले १९ बलमा ४ चौका र १ छक्का प्रहार गरे । अर्का ओपनर कोलिन मुनरो ५९ रनमा क्याच आउट भए ।

१२ औं ओभरको पाँचौ बलमा शार्दुल ठाकुरले युजभेन्द्र चहलबाट क्याच गराउनु अघि मुनरोले ४२ बलमा ६ चौका र २ छक्का प्रहार गरे । अलराउन्डर कोलिन डी ग्रान्डहोमले खाता खोल्न सकेनन् । भारतका जस्प्रित बुमराह, शार्दुल ठाकुर, रविन्द्र जडेजा, शिवम दुबे र युजभेन्द्र चहलले १-१ विकेट लिए ।