काठमाडौं (हाम्रो खेलकुद) – युवा ब्याट्सम्यान रोहितकुमार पौडेलले उत्कृष्ट ब्याटिङ गरेपछि नेपाल क्रिकेट संघ (क्यान) अध्यक्ष-११ ले मलेसिया छनोट-११ लाई तेस्रो एक दिवसिय अभ्यास खेलमा ५ विकेटले पराजित गरेको छ ।

मलेसिया छनोट ११ ले प्रस्तुत गरेको १ सय ५८ रनको लक्ष्य क्यानले २३.५ ओभरमा ५ विकेट गुमाउँदै पुरा गर्यो । क्यानको सहज जितमा रोहित कुमार पौडेलले ७० बलमा ८ चौका र ४ छक्का सहित ८१ रनको योगदान दिए । रोहितलाई २३ औं ओभरको पाँचौ बलमा अनवार रहमानले एलबीडब्लू आउट गरेका थिए । ओपनर सुनिल धमला ५ रनमा आउट हुँदा अर्का ओपनर कुशल भुर्तेलले खाता खोल्न सकेनन् ।

कप्तान दीपेन्द्र सिंह ऐरीले २४ बलमा ५ चौका र १ छक्का सहित २८ रन जोडे । लोकेश बमले २७ बलमा समान २ चौका र छक्का सहित २६, विनोद भण्डारी ५ र कुशल मल्ल १ रन जोडे । मलेसिया ११ का विजय उन्नीले २, देबेन्द्र मोगन, मोहम्मद हफिज र अनवार रहमानले १-१ विकेट लिए ।

त्यसअघि पोखरा रंगशालामा टस जितेर पहिला ब्याटिङ गर्ने निर्णय लिएको मलेसिया छनोट   ४३.५ ओभरमा १ सय ५७ रनमा अल आउट भएको थियो । मलेसिया-११ का ओपनर भुषण सेभले सर्वाधिक ३० रनको योगदान दिए । उनले ३८ बलमा ४ चौका र १ छक्का प्रहार गरे ।

शार्विन मुनियन्डी २२, कप्तान अहमद फैज शून्य, विरनदीप सिंह ९, ऐनूल हकीम ५, सैद अजिज १५, मोहम्मद आरिफ १७ र देवेन्द्र मोगनले २८ रनको योगदान दिए । देबेन्द्र मोगनले ४० बलमा समान २ चौका र छक्का प्रहार गरे ।

क्यान ११ का लागि तीब्र गतिका बलर अभिनाष बोहराले ९ ओभरमा ३० रन खर्चेर ३ विकेट लिए । स्पिनर ललित नारायण राजवंशीले ९ ओभरमा १ मेडन राख्दै २९ रन खर्चेर २ विकेट लिए । बायाँ हाते युवा अलराउन्डर कुशल मल्लले ९.४ ओभरमा ३० रन खर्चिदै २ विकेट लिए । किशोर महतो र कमल सिंह ऐरीले १(१ विकेट लिए ।

पहिलो अभ्यास खेलमा क्यान-११ ले मलेसिया-११ लाई १ सय ३५ र दोस्रो खेलमा १ सय ७० रनको फराकिलो अन्तरले हराएको थियो । मलेसिया-११ लाई क्यानले ओमान र अमेरिकासँग माघ २२ देखी २९ गते सम्म कीर्तिपुर क्रिकेट मैदानमा हुने एक दिवसिय त्रिकोणात्मक सिरिजको बन्द प्रशिक्षणमा रहेका २४ नेपाली खेलाडीसँग तीन एक दिवसिय अभ्यास खेलको ब्यवस्था मिलाएको हो । मलेसिया ११ टोली मनमोहन मेमोरियल एक दिवसिय क्रिकेट प्रतियोगिता खेल्न नेपाल आएको थियो ।