एजेन्सी – दक्षिण अफ्रिकामा जारी आईसीसी यू-१९ विश्वकप अन्तर्गत मंगलबारको खेलमा भारत र बंगलादेशले सहज जित निकालेका छन् ।

समुह ए को पहिलो खेलमा भारतले जापानलाई १० विकेटले हरायो । जापानले प्रस्तुत गरेको ४२ रनको सामान्य लक्ष्य भारतले ४.५ ओभरमा पुरा गर्यो । ओपनर कुमार कुशग्रा १३ र यशस्वी जैसवाल २९ रनमा अविजित रहे । जैसावालले १८ बलमा ५ चौका र १ छक्का प्रहार गरे ।

पहिलो पटक यू-१९ विश्वकप खेलि रहेको जापानले टस हारेर ब्याटिङ गर्दै २२.५ ओभरमा ४१ रनमा अलआउट भयो । उसका कुनै पनि खेलाडीले दोहोरो अंकमा रन छुन सकेनन् । भारतीय बलिङ सामु जापानका पाँच खेलाडीले खातै खोल्न सकेनन् । भारतका रवि बिश्नोईले ४, कात्र्तिक त्यागि ३ र आकश सिंहले २ विकेट लिए । पहिलो खेलमा भारतले श्रीलंकालाई ९० रनले हराएको थियो । जापानले पहिलो खेलमा न्युजिल्यान्डसँगको वर्षाको कारण १-१ अंक बाडेको थियो ।

समुह सी को खेलमा बंगलादेशले स्कटल्यान्डलाई ७ विकेटले पराजित गर्यो । ९० रनको सामान्य लक्ष्य १६.४ ओभरमा ३ विकेट गुमाउँदै पुरा गर्यो । हसन जोय ३५ र तौहीद हिरदोय १७ रनमा अविजित रहे । परवेज हुसैन एमोन २५ र समिम हसैनले १० रन जोडे । स्कटल्यान्डका सीन फिशरले ३ विकेट लिए ।

टस जितेर ब्याटिङ थालेको स्कटल्यान्ड ३०.३ ओभरमा ८९ रनमा अल आउट भयो। उसका सैद शाहले २८ र जेमी केर्न्सले १७ रन जोडे । स्कटल्यान्डका ८ खेलाडीले दोहोरो अंकमा रन छुन सकेनन् । बंगलादेशका रकीबुल हसनले ५.३ ओभरमा २० रन खर्चेर ह्याटि्रक सहित ४ विकेट लिए । रकीबुलले २४ औं ओभरको तेस्रो बलमा केस सज्जाद, चौथो लाइल रोबर्टसन र पाँचौ बलमा चार्ली पीटलाई आउट गर्दै ह्याटि्रक पुरा गरेका थिए ।

स्कटल्यान्ड पहिलो खेलमा पाकिस्तानसँग ७ विकेटले पराजित भएको थियो । पहिलो खेलमा बंगलादेशले जिम्बावेलाई ९ विकेटले हराएको थियो ।