काठमाडौं (हाम्रो खेलकुद) – नेपाल क्रिकेट संघ (क्यान) अध्यक्ष-११ ले दोस्रो एक दिवसिय अभ्यास खेलमा मलेसिया छनोट-११ लाई १ सय ७० रनको फराकिलो अन्तरले पराजित गरेको छ ।

क्यान-११ ले प्रस्तुत गरेको २ सय ९१ रनको लक्ष्य पछ्याएको मलेसिया २८.४ ओभरमा अल आउट हुँदै १ सय २० रनमा समेटियो । उसका ओपनर भुषण सेभले २४, विरनदीप सिंहले २३, सैद अजिजले २८ र अहमद फैजले १९ रन जोड्न बाहेक अन्यले दोहोरो अंकमा रन बनाउन सकेनन् ।

नेपालका स्पिनर ललित नारायण राजवंशीले ८ ओभरमा २८ रन खर्चेर ३ विकेट लिए । तीव्र गतिका बलर किशोर महतोले ७.४ ओभरमा २० रन खर्चेर ३ विकेट लिए । सुशन भारीले ७ ओभरमा ३७ रन खर्चेर २ विकेट लिए । कमल सिंह ऐरी र पवन सरार्फको नाममा १-१ विकेट रह्यो ।

त्यसअघि पोखरा रंगशालामा टस हारेर ब्याटिङ थालेको नेपालले ५० ओभरमा ८ विकेट गुमाउँदै २ सय ९० रन बनाएको थियो । नेपालका युवा खेलाडी रोहित कुमार पौडेलले ५४ बलमा ४ चौका र २ छक्का सहित ५७ रनमा रिटायर्ट आउट भए । १२ औं ओभरको पहिलो बलमा सुनिल धमला ३३ बलमा २ चौका र १ छक्का सहित २४ रनमा क्याच आउट भए । ओपनर सुवास खकुरेलले ७७ बलमा ४ चौका सहित ४८ रनमा बोल्ड आउट भए । सुवासलाई अनवार रहमानले बोल्ड आउट गरेका थिए ।

कप्तान ज्ञानेन्द्र मल्ल ४७ बलमा ५ चौका र २ छक्का सहित ५४ रनमा रिटायर्ड आउट भए । लोकेश बम २८ बलमा ४ चौका र २ छक्का सहित ३४ रनमा क्याच आउट हुन पुगे । विनोद भण्डारी २१ , पवन सरार्फले १२ र सुसन भारीले १६ रन जोडे । मलेसिया ११ का अनवार रहमान र नाजरिल रहमानले २-२ विकेट लिए । मोहम्मद आरिफ र शब्रिनको नाममा १-१ विकेट रह्यो ।

पहिलो अभ्यास खेलमा क्यान-११ ले मलेसिया-११ लाई १ सय ३५ रनको फराकिलो अन्तरले हराएको थियो । मलेसिया ११ सँग थप एक अभ्यास खेल्ने छ । मलेसिया-११ लाई क्यानले ओमान र अमेरिकासँग माघ २२ देखी २९ गते सम्म कीर्तिपुर क्रिकेट मैदानमा हुने एक दिवसिय त्रिकोणात्मक सिरिजको बन्द प्रशिक्षणमा रहेका २४ नेपाली खेलाडीसँग तीन एक दिवसिय अभ्यास खेलको ब्यवस्था मिलाएको हो ।