काठमाडौं (हाम्रो खेलकुद) – युवा ब्याट्सम्यान आरिफ शेखको उत्कृष्ट शतकसँगै एक दिवसिय अभ्यास खेलमा मलेसिया छनोट-११ माथि नेपाल क्रिकेट संघ (क्यान) अध्यक्ष-११ ले सहज जित हात पारेको छ ।

पोखरा रंगशालामा भएको पहिलो एक दिवसिय अभ्यास खेलमा क्यान अध्यक्ष-११ ले मलेसिया छनोट-११ लाई १ सय ३५ रनको फराकिलो अन्तरले पराजित गरेको छ । टस हारेर पहिला ब्याटिङ थालेको क्यान-११ ले ४७ ओभरमा अल आउट हुँदै २ सय ७७ रन बनाएको थियो । क्यान-११ को लागि युवा ब्याट्सम्यान आरिफ शेखले १ सय ५ बलमा ७ चौका र ५ छक्का सहित कुल १ सय १ रनको शतकीय इनिङ खेले । आरिफ रिटायर्ट आउट भएका थिए ।

ओपनर सुबास खकुरेल १२ र कप्तान ज्ञानेन्द्र मल्ल १९ रनमा आउट भए । पारस खड्का ११ औं ओभरको अन्तिम बलमा १५ रनमा क्याच आउट भएपछि नेपाल ५८-३ को अवस्थामा पुगेको थियो । चौथो विकेटका लागि आरिफ र सन्दीप जोराले १ सय ५३ रनको उत्कृष्ट शतकीय साझेदारी गर्दै नेपाललाई विशाल योगफलमा पुर्याए ।

सन्दीप जोराले ७० बलमा ७ चौका र १ छक्का सहित ५८ रनको योगदान दिए । कुशल भुर्तेल २, सुमित महर्जन ७ र कुशल मल्ल १४ रनमा आउट भए । करण केसीले तल्लोक्रममा १४ बलमा ३ छक्का र १ चौका सहित २६ रनको योगदान दिए । पवनदीप सिंहले १० ओभरमा ३१ रन खर्चेर २ विकेट लिए । त्यस्तै मोहम्मद आरिफले ६ ओभरमा ३३ रन खर्चेर ३ विकेट लिए । मोहम्मद नजरिलको नाममा २ विकेट रह्यो ।

जितका लागि २ सय ७८ रनको लक्ष्य पछ्याएको मलेसिया ३७.२ ओभरमा अल आउट हुँदै १ सय ४२ रन बनायो । ओपनर भुषण सेभ ८, ऐनुल हकिम २८, अहमद फैज ६, विरनदीप सिंह २४ र सैद अजिज २८ रनमा आउट भए । करण केसीले ८ ओभरमा २ मेडन सहित २७ रन खर्चेर ३ विकेट लिए । कमल सिंह ऐरीले ७ ओभरमा १ मेडन सहित २४ रन खर्चेर ३ विकेट लिए । कुशल मल्लले २ विकेट लिदा अभिनास बोहरा र पारस खड्काले १-१ विकेट लिए ।

सुनसरीको इनरुवामा सम्पन्न मनमोहन मेमोरियल राष्ट्रिय एकदिवसिय क्रिकेट प्रतियोगिताको लागि मलेसिया छनोट-११ अघिल्लो हप्ता नेपाल आएको थियो । मलेसिया-११ लाई क्यानले ओमान र अमेरिकासँग हुने त्रिकोणात्मक सिरिजको बन्द प्रशिक्षणमा रहेका नेपाली २४ खेलाडीसँग तीन एक दिवसिय अभ्यास खेलको ब्यवस्था मिलाएको हो ।

तस्बिरहरु : सुदर्शन रञ्‍जित