एजेन्सी – अष्ट्रेलियामा जारी बिग ब्यास लिगमा नेपाली लेग स्पिनर सन्दीप लामिछाने सम्मिलित मेलबर्न स्टार्स सिड्नी सिक्सर्ससँग डक वर्थ लेविस पद्धतीको आधारमा २१ रनले पराजित भएको छ ।

जितका लागि १ सय ४७ रनको विजयी लक्ष्य पछ्याएको मेलबर्न स्टार्सले निर्धारित १४ ओभरमा ५ विकेट गुमाउँदै १ सय २५ रन बनायो । मेलबर्नका ओपनर मार्कस स्टोइनिसले ३७ बलमा ३ चौका र ४ छक्का सहित ६२ रनको योगदान दिएपनि टोलीको हार टार्न सकेनन् । ओपनर हिल्टन कार्टराइटले २१, कप्तान ग्लेन म्याक्सवेल १२ र निक मिडिनसनले २१ रनको योगदान दिए । बेन द्धारिसहुइस र टम करनले २-२ विकेट लिए । नाथन लायनको नाममा १ विकेट लिए ।

त्यसअघि टस हारेर ब्याटिङको निम्तो पाएको सिड्नीले निर्धारित १४ ओभरमा ४ विकेट गुमाउँदै १ सय ४३ रन बनाएको थियो । वर्षाको कारण खेल ६ ओभर घटाईएको थियो । सिड्नीका कप्तान मोइसेस हेनरिक्सले मात्रै ३१ बलमा ८ छक्का र २ चौका सहित ७२ रन जोडेपछि विशाल योगफल बनाएको हो ।

जेम्श भिन्स २२ बलमा २ छक्का र १ चौका सहित ४१ रनमा अविजित रहे । सन्दीपले ३ ओभरमा ३८ रन खर्चेर २ विकेट लिए । डानियल वोरलको नाममा १ विकेट रह्यो । सन्दीपले पाँचौ ओभरमा मात्र ३ रन खर्चेर २ विकेट लिए । डानियल ह्यूजेस र दोस्रोमा जोश फिलिपलाई एक एक रन दिए । तेसो बल डट राखे । चौथो बलमा डानियललाइ सन्दीपले १४ रनमा स्टम्पिङ आउट गराए । पाचौं बलमा जेम्श भिन्सलाइ १ रन दिएका सन्दीपले अन्तिम बलमा फिलिपलाइ १० रनमा क्याच गराए ।

सन्दीपले ७ औं ओभरमा ११ रन खर्चिए । ११ औं ओभरमा सन्दीपले २४ रन खर्चिए । जेम्स भिन्सले पहिलो बलमा छक्का र दोस्रो बलमा चौका प्रहार गरे । तेस्रो बलमा एक रन दिए । चौथो र पाचौं बलमा मोइसेस हेनरिक्सले लगातार छक्का प्रहार गरेपछि सन्दीप महगो साबित भएका हुन् ।

मेलबर्न स्टार्सको जारी बिग ब्यास लिगमा यो दोस्रो हार हो । मेलबर्न स्टार्स १२ खेलमा १० मा जित र २ मा हार सहित शीर्ष स्थानमा छ । सिड्नी सिक्सर्स १२ खेलमा ७ मा जित र ४ मा हार सहित दोस्रो स्थानमा रहेको छ । मेलबर्नले आफ्नो १३ औं खेलमा एडिलेड स्टाइकर्ससँग बुधबार खेल्ने छ ।