सुनसरी(हाम्रो खेलकुद) – सुनसरीको इनरुवामा जारी मनमोहन मेमोरियल राष्ट्रिय एक दिवसिय क्रिकेट प्रतियोगितामा मलेसिया-११ लाई सुदूरपश्चिम प्रदेशले ८ विकेटले हराएको छ ।

मलेसिया-११ ले प्रस्तुत गरेको ५० रनको सामान्य लक्ष्य सुदूरपश्चिमले ७.२ ओभरमा २ विकेट गुमाउँदै पुरा गरेको हो । सुदूरपश्चिमका ओपनर खडक बोहरा १७ बलमा ३ चौका सहित १५ रनमा अविजित रहे ।

सातौं ओभरको पहिलो बलमा अनवार रहमानले अरुण ऐरीलाई कट एण्ड बोल्ड आउट गर्नु अघि ३ बलमा १ चौका सहित ६ रन मा आउट भए । चौथो ओभरको अन्तिम बलमा धिवेन्द्रन मोगनले ओपनर गजेन्द्र बोहरालाई ११ रनमा बोल्ड आउट गरे । गजेन्द्रले १८ बलमा २ चौका प्रहार गरे । विकेटकिपर लोकेश बम ७ बलमा ३ चौका सहित १५ रनमा अविजित रहे ।

त्यस अघि इनरुवा क्रिकेट मैदानमा टस जितेर ब्याटिङ रोजेको मलेसिया-११ ले २२ ओभरमा अल आउट हुँदै ४९ रनमा समेटिएको थियो । सुदूरपश्चिमा दुई स्पिनर शेर मल्ल र विनोद लामाको घातक बलिङ सामु मलेसिया-११ का १० खेलाडीले दोहोरो अंकमा रन छुन सकेनन् ।
मलेसिया-११ युवा ब्याट्सम्यान विरनदीप सिंहले ६९ बलमा ३ चौका सहित सर्वाधिक २२ रनको योगदान दिए ।

पहिलो ओभरको चौथो बलमै स्पिनर विनोद लामाले मलेसिया-११ का भूषण सेभलाइ ४ रनमा बोल्ड आउट गरे । दोस्रो ओभरको पहिलो बलमै अर्का स्पिनर शेर मल्लले कप्तान मोहम्मद नुरलाई १ एक रनमा कट एण्ड बोल्ड आउट गर्दै पेभिलिएन फर्काए ।

विनोदले सातौं ओभर पहिलो बलमा मलेसियाका सर्बियन मुनियनलाइ २ रनमा एलबी डब्लु आउट गरेपछि मलेसिया १०-३ को अवस्थामा पुगेको थियो। ८ औं ओभरको तेस्रो बलमा शेर मल्लले तेस्रो बलमा हकिम र पाँचौ बलमा सैद अजिजलाई शून्यमा पेभिलिएन फर्काएपछि मलेसिया संकटमा परेको थियो ।

विनोद लामाले नवौं ओभरको तेस्रो बलमा मोहम्मद आरिफलाई शून्यमा कट एण्ड बोल्ड आउट गरे । शेरले नाजिर रहमान १ र धिवेन्द्रन मोगनलाइ ५ रनमा आउट गरे । अनवार रहमन ३ रनमा आउट भए ।

युवा स्पिनर शेर मल्लले १० ओभरमा ३ मेडन सहित ११ रन खर्चेर ५ विकेट लिए । विनोद लामाले ९ओभरमा ३ मेडन सहित २१ रन खर्चेर ४ विकेट लिए । बिक्रम ठगुन्नाले १ विकेट लिए ।