भूपेन्द्र जिसी, सुनसरी

‘सपनामै छु जस्तो लागिरहेको छ । विश्वास नै गर्न सकिरहेको छैन ।’

युवा ब्याट्सम्यान लोकेश बमले पहिलो पटक सिनियर राष्ट्रिय क्रिकेट टोलीको बन्द प्रशिक्षणमा परेपछि कस्तो लागिरहेको छ भनेर सोध्दा यहि जवाफ दिए । आईसीसी विश्वकप लिग २ अन्तर्गत घरेलु मैदानमा हुने ओमान र अमेरिकासँगको त्रिकोणात्मक सिरिज बन्द प्रशिक्षणको लागि शुक्रबार घोषणा गरिएको सुरुवाती २४ खेलाडीमा परेपछि युवा ब्याट्सम्यान लोकेशले हाम्रो खेलकुदसँग कुराकानी गर्दै यस्तो प्रतिक्रिया दिएका हुन् ।

दुई साताअघि मात्र पोखरा प्रिमियर लिगमा विराटनगर टाइटन्सबाट खेल्दै फ्रेन्चाइज लिगमा डेब्यू गरेका उनले राम्रो प्रदर्शन गरे । उमेर समूहको क्रिकेटमा औसत प्रदर्शन गरेका उनले पीपीएलमा राम्रो छाप छाडेपछि पहिलो पटक सिनियर टोलीको बन्द प्रशिक्षणमा परेका हुन् ।

त्यसो त शुक्रबार राष्ट्रिय टोलीमा पर्नुअघि नै उनले अर्को सुखद समाचार सुन्न पाएका थिए । पीपीएलको प्रदर्शनले उनलाई घरेलु लिगको उत्कृष्ट इपिएल खेल्ने अवसर जुराएको थियो । पोखरा राइनोजले पछिल्लो संस्करणमा सन्न्यास लिएका शक्ति गौचनको स्थानमा लोकेशलाई टोलीमा समेटेको खबरले उनलाई उत्साहित बनाएको थियो ।

सुनसरीमा जारी मनमोहन मेमोरियल राष्ट्रिय एकदिवसिय क्रिकेट प्रतियोगिताको लागि सुदूरपश्चिम प्रदेशबाट खेल्न शुक्रबारमात्र उनी काठमाडौंबाट इनरुवा आईपुगेका हुन् । यहाँ आएलगत्तै इपिएल खेल्ने खबर पाएका उनले सिनियर टोलीमा परेको खबर सुरुमा पत्याउनै गाह्रो भएको बताए ।

‘बाहिरबाट कोठामा आउँदै थिएँ । साथी शेर मल्लले सिनियर टोलीमा परेको भनेर भन्यो । सुरुमा हाँसो ठट्टा गरेको होला भन्ने लाग्यो । तर पछि साँच्चै रहेछ । सोचेको पनि थिइन यस्तो होला भनेर । खुसी को सिमा नै रहेन’ , उनले भने ।

पहिलो फ्रेन्चाइज लिगका रुपमा दुई साताअघि सम्पन्न पोखरा प्रिमियर लिग खेलेका लोकेशले सिनियर टोलीको बन्द प्रशिक्षणमा पर्ने तत्काल कल्पना पनि नगरेको बताउँछन् । ‘टि ट्वान्टी भएको भए आशा लाग्थ्यो होला । एक दिवसिय खेल भएको हुँदा साँच्चै भन्नुपर्दा मैले कुनै आशा गरेको थिईन,’ उनले भने ।

पाएको यस अवसरलाई लोकेश अब बन्द प्रशिक्षणमा राम्रो सदुपयोग गर्ने प्रयास गर्ने बताउँछन् । ‘सिनियर टोलीमा पर्दा निकै खुसी छु । अब यो अवसरलाई भरपुर सदुपयोग गर्नेछु । बन्द प्रशिक्षणमा राम्रो गरेमात्र टोलीमा स्थान बनाउन सकिन्छ । लगातार मिहिनेत गर्छु र आफ्नो लयलाई निरन्तरता दिने प्रयास हुनेछ,’  उनले भने ।

धनगढी क्रिकेट एकेडेमीबाट हुर्किएका १७ वर्षिय ब्याट्सम्यान लोकेशले यू१९ उमेर समूह हुँदै छोटो समयमै घरेलु क्रिकेटमा राम्रो छाप छाडेका छन् । पीपीएल लिग चरणमा पारस खड्का कप्तान रहेको चितवन राइनोजविरुद्ध ३६ बलमा ५ चौका र ५ छक्का सहित ६२ रनको उत्कृष्ट इनिङ खेल्दै सबैको मन जित्न सफल भएका थिए । लोकेश पीपीएलमा मोस्ट भ्यालुएवल खेलाडी घोषित भएका थिए । आक्रामक शैलीमा ब्याटिङ गर्ने लोकेश टोलीलाई राम्रो सुरुवात दिने गर्दछन् ।

गतवर्ष भारतको लखनउमा यू१९ मा डेब्यू गरेका लोकेशले असारमा मलेसियामा भएको एसीसी यू१९ इस्टर्न रिजनको उपाधि जित्दा उनी टोलीमा थिए । दुई महिना अघि मेरिलेबोन क्रिकेट क्लब (एमसीसी) ले नेपाल भ्रमणका क्रममा नेपाली यू-१९ क्रिकेट टोलीसँग मैत्रीपूर्ण एकदिवसीय खेलमा पनि लोकेशले राम्रो सुरुवात दिलाएका थिए । लोकेशले ओपनिङ, शीर्षक्रम र तल्लोक्रम सबैमा ब्याटिङ गर्ने क्षमता राख्छन् । लोकेश वैकल्पिक विकेटकीपर समेत हुन् । लोकेश इनरुवामा जारी एमएम कपपछि बन्द प्रशिक्षणको लागि पोखरा जाने छन् ।