सुनसरी (हाम्रो खेलकुद) – नेपाल पुलिस क्लब सुनसरीको इनरुवामा जारी मनमोहन मेमोरियल राष्ट्रिय एकदिवसिय क्रिकेट प्रतियोगिताको सेमिफाइनलमा प्रवेश गरेको छ । शुक्रबार प्रदेश नम्बर २ लाई ४६ रनले पराजित गर्दै पुलिस समुह बी बाट विजेता बन्दै सेमिफाइनलमा प्रवेश गरेको हो ।

१ सय ८४ रनको विजयी लक्ष्य पछ्याएको २ नम्बर प्रदेश ४२.२ ओभरमा अल आउट हुँदै १ सय ३७ रनमा समेटियो । प्रदेश २ का लागि युवा खेलाडी विशाल शुश्लिङ ८० रनको उत्कृष्ट इनिङ खेलेपनि एक्लो प्रयासले टोलीको हार टार्न सकेनन् ।

४३ औं ओभरको तेस्रो बलमा पवन सरार्फलाई ठूलो सट प्रहार गरेका विशाल बाउन्डी लाइन नजिकै ललित भण्डारीबाट क्याच आउट हुनुअघि १ सय १२ बलमा ८ चौका र ५ छक्का प्रहार गरेपनि टोलीको हार टार्न सकेनन् ।

अन्तिम विकेटका लागि कुमार थापा र विशालले ६१ रनको साझेदारी गर्दै खेललाई रोमान्चक बनाएका थिए । कुमार थापा ७ रनमा अविजित रहे । पहिलो ओभरको चौथो बलमा ललित भण्डारीले ओपनर सुधीर चौधरीलाई कट एण्ड बोल्ट आउट गर्दै ४ रनमा पेथिलियन फर्काए ।

आठौं ओभरको अन्तिम बलमा दीपेन्द्र सिंह ऐरिले हसिम अन्सारीलाई १० रनमा एलबी डब्लु आउट गरे । सुरज पटेल १ र तृत राज दास शुन्यमा आउट भए । १६ औं ओभरको चौथो बलमा हरि शकर शाहलाई १८ रनमा क्याच आउट गराएपछि प्रदेश २ को जित टाढिएको थियो ।

कप्तान महबुब आलम र विवेक यादवले खातै खोल्न सकेनन् । राहुल प्रताप सिंह १ र आदिल अन्सारी शून्यमा आउट भए । पुलिसका लागि तीब्र गतिका बलर ललित भण्डारीले ६ ओभरमा ६१ रन खर्चेर ३ विकेट लिए । दीपेन्द्र सिंह ऐरीले ७ ओभरमा २ मेडन सहित २० रन खर्चेर ३ विकेट लिए । पवन सरार्फ २, सागर ढकाल र ललित नारायण राजवंशीले १-१ विकेट लिए ।

त्यसअघि पुलिस ४८.१ ओभरमा १ सय ८३ रनमा अल आउट भएको थियो । पुलिसका दीपेन्द्र सिंह ऐरीले सर्वाधिक ५० रनको योगदान दिए । ४१ औं ओभरको दोस्रो बलमा राहुल प्रताप सिंहले कुमार थापाबाट क्याच आउट गराउनु अघि दीपेन्द्रले ६४ बलमा ५ चौका २ छक्का प्रहार गरे ।

त्यसअघि दीपेन्द्रले खाता नखोल्दै हरि शंकर शाहले मिड अफमा सहज क्याच छाडेपछि जीवनदाएका थिए । १३ औं ओभरको पहिले बलमा ओपनर सुनिल धमला ७ रनमा रन आउट भए । १७ औं ओभरको तेस्रो बलमा युवा तीब्र गतिका वलर विवेक यादवले अमितलाई ३६ रनमा बोल्ड आउट गरे । अमितले ६५ बलमा ५ चौका प्रहार गरे ।

२४ औं ओभरको पहिलो बलमै स्पिनर कुमार थापाले अनिल कुमार शाहलाई तृतदासबाट १९ रनमा क्याच गराए । खराब सट खेल्दै आउट हुनु अघि अनिलले १९ बलमा ३ चौका प्रहार गरे । कुमारले २६ ओभरको दोस्रो बलमा पवन सरार्फलाई ३ रनमा बोल्ड आउट गरे । लगत्तै तेस्रो बलमा कुशल भुर्तेललाई कुमारले एलवी डब्लु आउट गराए ।

कुमारले ३० औं ओभरको पाँचौ बलमा मिड अनमा रहेका हसिम अन्सारीबाट कप्तान मञ्जित श्रेष्ठलाई ४ रनमा क्याच गरापछि पुलिस संकटमा परेको थियो । कुमारले राशिद खानलाई आदिल अन्सारीबाट १६ रनमा क्याच आउट गराए । राशिदले ३६ बलमा १ चौका प्रहार गरे ।

प्रदेश नम्बर २ का स्पिनर कुमार थापाले १० ओभरमा ३ मेडन सहित ३२ रन खर्चिदै ५ विकेट लिएपनि ब्याटिङ चल्न नसक्दा टोलीको हार टार्न सकेनन् । राहुल प्रताप सिंह र विवेक यादवले २/२ विकेट लिए । पहिलो खेलमा पुलिसले कर्णाली प्रदेशलाई २ सय ६७ रनले हराएको थियो ।

दोस्रो खेलमा प्रदेश २ ले कर्णालीलाई ८ विकेटले हराएको थियो । समुह ए बाट आर्मी र समुह सी बाट प्रदेश नम्बर ३ सेमिफाइनलमा प्रवेश गरि सकेका छन् । अव समुह डीको खेल हुन बाँकी छ । समुह डी मा मलेसिया ११, सुदूरपश्चिम प्रदेश र गण्डकी छन् । पहिलो सेमिफाइनलमा प्रदेश ३ र आर्मी तथा दोस्रोमा पुलिस र समुह ‘डी’ को विजेता भिड्ने छन् ।