सुनसरी (हाम्रो खेलकुद) – लेग स्पिनर कुमार थापाको उत्कृष्ट बलिङमा सुनसरीको इनरुवामा जारी मनमोहन मेमोरियल राष्ट्रिय एकदिवसिय क्रिकेट प्रतियोगिता अन्तर्गत समुह बी को अन्तिम खेलमा नेपाल पुलिस क्लबले प्रदेश नम्बर २ लाई १ सय ८४ रनको लक्ष्य दिएको छ ।

इनरुवा क्रिकेट मैदानमा टस हारेर ब्याटिङ थालेको पुलिस ४८.१ ओभरमा अल आउट हुँदै १ सय ८३ रनमा समेटियो । लेग स्पिनर कुमार थापाले पुलिसको मध्यक्रम र तल्लोक्रम ध्वस्त बनाएपछि प्रदेश २ ले सेमिफाइनलमा स्थान बनाउन मध्यम लक्ष्य पाएको हो ।

पुलिसका सिनयिर टोलीका उप कप्तान दीपेन्द्र सिंह ऐरीले सर्वाधिक ५० रनको योगदान दिए । ४१ औं ओभरको दोस्रो बलमा राहुल प्रताप सिंहले कुमार थापाबाट क्याच आउट गराउनु अघि दीपेन्द्रले ६४ बलमा ५ चौका २ छक्का प्रहार गरे । त्यसअघि दीपेन्द्रले खाता नखोल्दै हरि शंकर शाहले मिड अफमा सहज क्याच छाडेपछि जीवनदाएका थिए ।

१३ औं ओभरको पहिले बलमा ओपनर सुनिल धमला ७ रनमा रन आउट भए । २९ बलको सामना गरेका धमलालाई तृत दासले रन आउट गराए । पहिलो विकेटको लागि धमला र अमित श्रेष्ठले ३६ रनको साझेदारी गरेका थिए । १७ औं ओभरको तेस्रो बलमा युवा तीब्र गतिका वलर विवेक यादवले अमितलाई ३६ रनमा बोल्ड आउट गरे । अमितले ६५ बलमा ५ चौका प्रहार गरे ।

२४ औं ओभरको पहिलो बलमै स्पिनर कुमार थापाले अनिल कुमार शाहलाई तृतदासबाट १९ रनमा क्याच गराए । खराब सट खेल्दै आउट हुनु अघि अनिलले १९ बलमा ३ चौका प्रहार गरे । कुमारले २६ ओभरको दोस्रो बलमा पवन सरार्फलाई ३ रनमा बोल्ड आउट गरे । लगत्तै तेस्रो बलमा कुशल भुर्तेललाई कुमारले एलवी डब्लु आउट गरेपछि पुलिस दबाबमा परेको थियो ।

कुमारले ३० औं ओभरको पाँचौ बलमा मिड अनमा रहेका हसिम अन्सारीबाट कप्तान मञ्जित श्रेष्ठलाई ४ रनमा क्याच गरापछि पुलिस संकटमा परेको थियो । कुमारले राशिद खानलाई आदिल अन्सारीबाट १६ रनमा क्याच आउट गराए । राशिदले ३६ बलमा १ चौका प्रहार गरे ।

प्रदेश नम्बर २ का स्पिनर कुमार थापाले १० ओभरमा ३ मेडन सहित ३२ रन खर्चिदै ५ विकेट लिए । राहुल प्रताप सिंह र विवेक यादवको नाममा २-२ विकेट रह्यो ।