सुनसरी (हाम्रो खेलकुद) – मनमोहन मेमोरियल राष्ट्रिय क्रिकेट प्रतियोगिता अन्तर्गत समुह ए को दोस्रो खेलमा सोमबार सशस्त्र प्रहरी बल (एपीएफ) क्लबले आयोजक मनमोहन मेमोरियल क्रिकेट सेन्टर इनरुवालाई ८३ रनले पराजित गरेको छ ।

जितका लागि २ सय ५ रनको विजयी लक्ष्य पछ्याएको इनरुवा ४३.४ ओभरमा अल आउट हुँदै १ सय २१ रनमा समेटियो । तेस्रो ओभरको पाँचौ बलमा योग्यमान कुमालले ओपनर सुसान्त तिमिल्सिनालाई ९ रनमा बोल्ड आउट गरे । दोस्रो विकेटका लागि एपीएफले १९ औं ओभर पर्खिनु पर्यो । १९ औं ओभरको पाँचौ बलमा सुर्य तामाङले रवि रोयलाई २९ रनमा पृथु बास्कोटाबाट क्याच गराए । रोयले ४९ बलमा २ चौका र १ छक्का प्रहार गरे । २३ औं ओभरको अन्तिम बलमा विवेक मेहेतालाई १५ रनमा क्याच आउट गराए ।

कप्तान वसन्त रेग्मीले अलफज मनसुरीलाई ३ रनमा एलबी डब्लू आउट गरे । ३० औं ओभरको चौथो बलमा सरोज बस्नेतलाई अमर सिंह राउटेलाले २ रनमा बोल्ड आउट गरे । रुपेश श्रीवाष्तवले ३२ बलमा ३ चौका सहित २३ रनमा आउट भए । राकेश रोनी ७ र सोनु मण्डल १ रनमा आउट भए ।  कप्तान वसन्त रेग्मीले ७ ओभरमा १ मेडन सहित १० रन खर्चेर ३ विकेट लिए । त्यस्तै युवा स्पिनर सुर्य तामाङले ८.२ ओभरमा २ मेडन सहित २५ रन खर्चेर ४ विकेट लिए । अमर सिंह राउटेलाको नाममा १ विकेट रह्यो ।

त्यअघि इनरुवा क्रिकेट मैदानमा टस जितेर ब्याटिङ थालेको एपीएफ ४३.४ ओभरमा २ सय ४ रनमा अल आउट भएको थियो। एपीएफका युवा ब्याट्सम्यान सुमित महर्जनले सर्वाधिक ८३ रनको योगदान दिए । एक तर्फबाट विकेट पतन भइ राखेपनि सुमितले अर्कोतर्फबाट रन जोड्दै एपीएफलाई बलियो योगफलामा पुर्याए । सुमितले १ सय ७ बलमा ७ चौका प्रहार गरे ।

अफ्जल मनसुरीको ४२ औं ओभरको तेस्रो बलमा ठूलो सट खेलेका सुमितलाई लङअनमा सुसान्त तिमिल्सिनाले उत्कृष्ट क्याच गरेपछि शतकबाट चुकेका थिए । ब्यक्तिगत ६ रनमा अलफज मनसुरीले क्याच छाड्दा सुमितले जीवनदान पाएका थिए । पहिलो ओभरको तेस्रो बलमै ओपनर प्रज्वल शाहीलाई भुपाल लुइटेलले विकेटकीपर राकेश सोनीबाट क्याच गराउँदै शून्यमा पेभिलिएन फकाए । छैटौं ओभरको पाँचौ बलमा सोनु मण्डलले उत्कृष्ट आफैं क्याच लिदै विकेटकीपर प्रदीप ऐरीलाई १९ रनमा पेभिलिएन फर्काए ।

कप्तान सरोज बस्नेतले रवि रोयबाट ओपनर शंकर रानालाई १५ औं ओभरको चौथो बलमा ३६ रनमा क्याच गराए । शंकरले ३३ बलमा ५ चौका र १ छक्का प्रहार गरे । सरोजलेनै १७ औं ओभरको अन्तिम बलमा पृथु बास्कोटालाई ५ रनमा बोल्ड आउट गरे ।

२३ औं ओभरको अन्तिम बलमा सरोजले युवा ब्याट्सम्यान सन्दीप जोरालाई १२ रनमा एलबी डब्लू आउट गरे । सरोजले कप्तान वसन्त रेग्मीलाई २९ ओभरको पहिलो बलमा १२ रनमा बोल्ड आउट गरे । अमर सिंह राउटेला ९ रनमा एलबी डब्लू आउट हुन पुगे । इरशाद अहमद ३, योग्यमान कुमाल ५ र सुर्य तामाङले ३ रन जोडे । इनरुवा कप्तान तथा स्पिनर सरोज बस्नेतले ९ ओभरमा १ मेडन सहित ३९ रन खर्चेर ४ विकेट लिए । अलफ्ज मनसरी, भुपाल लुइटेल र सोनु मन्डलले २–२ विकेट लिए ।

समुह ए को पहिलो खेलमा एपीएफ त्रिभुवन आर्मी क्लबसँग १ सय ८ रनले पराजित भएको थियो । समुह ए को अन्तिम खेलमा मंगलबार आर्मी र इनरुवा भिड्ने छन् । जुन खेलमा इनरुवाले आश्चर्यजनक फराकिलो जित निकाल्ने सके एपीएफ नाटकीय रुपमा सेमिफाइनलमा पुग्ने छ । अन्यथा समुह चरणबाटै बाहिरीने समिकरण छ ।

यो पनि पढ्नुहोस : सन्दीपलाई एक खेल प्रतिबन्ध