सुनसरी (हाम्रो खेलकुद) – नेपाली राष्ट्रिय क्रिकेट टोली तथा विभागीय टोली नेपाल एपीएफ क्लबका युवा ब्याट्सम्यान सन्दीप जोरालाई एक खेल प्रतिबन्ध लागेको छ ।

मनमोहन मेमोरियल राष्ट्रिय क्रिकेट एकदिवसिय क्रिकेट प्रतियोगिता अन्तर्गत समुह ए को खेलमा सोमबार आयोजक टोली मनमोहन मेमोरियल क्रिकेट सेन्टर इनरुवाविरुद्ध सशस्त्र प्रहरी बल (एपीएफ) बाट खेल्ने क्रममा एम्पारले दिएको एलबी डब्लू निर्णयप्रति असन्तुष्टि जनाएपछि एक खेल प्रतिबन्ध लागेको हो ।

जोराले एमएमकप अन्तर्गत एक खेल खेल्न पाउने छैनन् । एमएमकपका म्याच रेफ्री समिर खानको अनुसार अम्पायरको निर्णयमा असन्तुष्टी जनाउँदै विवाद गरेपछि केहि शब्द बोलेको र क्रिज छोड्न ढिलाई गरेको हुँदा आईसीसीको आचार सहिंता २.८ को अनुसार कारबाही परेको जनाएका छन् । जुन गल्ती सन्दीप जोराले स्वीकार गरेका छन् । २३ औं ओभरको अन्तिम बलमा इनरुवाका कप्तान सरोज बस्नेतले सन्दीप जोरालाई १२ रनमा एलबी डब्लू आउट गरेका थिए । जुन एलबीडब्लूमा जोराले असन्तुष्टी जनाएका थिए ।

एपीएफले समुह ए बाट दुबै खेल खेलेको छ । पहिलो खेलमा नेपाल आर्मीसँग ८ विकेटले पराजित हुँदा इनरुवालाई ८३ रनले पराजित गरेको छ । एपीएफको सेमिफाइनल समिकरणको संभावना अंक गणितीयमात्रै बाँकी छ । यो पटक एपीएफ सेमिफाइनलमा नपुगे अर्को संस्करणको पहिलो खेल उनी खेल्न पाउने छैनन् ।

यो पनि : एपीएफको सहज जित