सुनसरी (हाम्रो खेलकुद) – युवा ब्याट्सम्यान सुमित महर्जनले उत्कृष्ट अर्ध शतकीय इनिङ खेलेपछि मनमोहन मेमोरियल राष्ट्रिय क्रिकेट प्रतियोगितामा सशस्त्र प्रहरी बल (एपीएफ) क्लबले आयोजक मनमोहन मेमोरियल क्रिकेट सेन्टर (एमएमसीसी) इनरुवालाई २ सय ५ रनको लक्ष्य दिएको छ ।

इनरुवा क्रिकेट मैदानमा टस जितेर ब्याटिङ थालेको एपीएफ ४३.४ ओभरमा अल आउट हुँदै २ सय ४ रनमा समेटियो । हुस्स र खराब मौसमले गर्दा खेल सुरुहुन केहि ढिला हुँदा ५ ओभर घटाइएको थियो ।
एपीएफका युवा ब्याट्सम्यान सुमित महर्जनले सर्वाधिक ८३ रनको योगदान दिए ।

एक तर्फबाट विकेट पतन भइ राखेपनि सुमितले अर्कोतर्फबाट रन जोड्दै एपीएफलाई बलियो योगफलामा पुर्याए । सुमितले १ सय ७ बलमा ७ चौका प्रहार गर्दै एपीएफलाई बलियो योगफलमा पुर्याए ।

अफ्जल मनसुरीको ४२ औं ओभरको तेस्रो बलमा ठूलो सट खेलेका सुमितलाई लङअनमा सुसान्त तिमिल्सिनाले उत्कृष्ट क्याच गरेपछि शतकबाट चुकेका थिए । ब्यक्तिगत ६ रनमा अफ्जल मनसुरीले क्याच छाड्दा सुमितले जीवनदान पाएका थिए । सुमितले ६५ बलमा अर्ध शतक पुरा गरेका थिए ।

पहिलो ओभरको तेस्रो बलमै ओपनर प्रज्वल शाहीलाई भुपाल लुइटेलले विकेटकीपर राकेश सोनीबाट क्याच गराउँदै शून्यमा पेभिलिएन फकाए । छैटौं ओभरको पाँचौ बलमा सोनु मण्डलले उत्कृष्ट आफैं क्याच लिदै विकेटकीपर प्रदीप ऐरीलाई १९ रनमा पेभिलिएन फर्काए ।

कप्तान सरोज बस्नेतले रवि रोयबाट ओपनर शंकर रानालाई १५ औं ओभरको चौथो बलमा ३६ रनमा क्याच गराए । शंकरले ३३ बलमा ५ चौका र १ छक्का प्रहार गरे । सरोजलेनै १७ औं ओभरको अन्तिम बलमा पृथु बास्कोटालाई ५ रनमा बोल्ड आउट गरेपछि विभागिय टोली एपीएफ दबाबमा परेको थियो ।

२३ औं ओभरको अन्तिम बलमा सरोजले युवा ब्याट्सम्यान सन्दीप जोरालाई १२ रनमा एलबी डब्लू आउट गरे । सरोजले कप्तान वसन्त रेग्मीलाई २९ ओभरको पहिलो बलमा १२ रनमा बोल्ड आउट गरे । अमर सिंह राउटेला ९ रनमा एलबी डब्लू आउट हुन पुगे । इरशाद अहमद ३, योग्यमान कुमाल ५ र सुर्य तामाङले ३ रन जोडे ।

इनरुवा कप्तान तथा स्पिनर सरोज बस्नेतले ९ ओभरमा १ मेडन सहित ३९ रन खर्चेर ४ विकेट लिए । अफ्जल मनसरी, भुपाल लुइटेल र सोनु मन्डलले २–२ विकेट लिए ।