एजेन्सी – लेग स्पिनर सन्दीप लामिछानेले अष्ट्रेलियाको बिग ब्यास लिग अन्तर्गत शनिबार मेलबर्न स्टार्सका लागि मेलबर्न रेनेगेड्सविरुद्ध उत्कृष्ट बलिङ प्रदर्शन गरेका छन् ।

पछिल्लो खेल सामान्य चोटका कारण विश्राममा रहेका सन्दीपले डर्बी खेलमा उत्कृष्ट पुनरागमन गरेका हुन् । उनले पहिलो ब्याटिङ गरेको रेनेगेड्सका दुई प्रमुख ब्याट्सम्यानलाई एकै ओभरमा आउट गरेका थिए । सन्दीपले समग्रमा ४ ओभर बलिङ गर्दै २६ रन खर्चेर ३ विकेट लिए ।

पहिलो ओभरमा ७ रन खर्चेका सन्दीपले दोस्रो ओभरमा १२ रन दिए । तेस्रो ओभरमा २ विकेटसँगै सन्दीपले ४ रन दिएका थिए । तेस्रो ओभरको तेस्रो बलमा उनले सर्वाधिक रन जोडेका सन मार्सलाई क्याचआउट गराए । बाउन्ड्रीमा बेन डंक र नाथन कुल्टर नाइलले उत्कृष्ट क्याच लिएका थिए ।

पाँचौ बलमा आक्रामक अलराउन्डर ड्यान क्रिस्टियनलाई सन्दीपले ह्यान्ड्सकम्बको हातबाट शून्यमा स्टम्पिङ गराएका थिए । चौथो ओभरको पाँचौ बलमा टम कुपरको क्याच कप्तान ग्लेन म्याक्सवेलले ड्रप गरेपनि अन्तिम बलमा उनले कुपरलाई एलबीडब्लू धरापमा पारे ।

रेनेगेड्सले निर्धारित २० ओभरमा ९ विकेट गुमाउँदै १ सय ४२ रन जोड्यो । ओपनर स्याम हार्परले १२ रन जोड्दा कप्तान आरोन फिंच २५ रनमा बोल्ड भए । सन मार्सले ३३ बलमा सर्वाधिक ४३ रनको योगदान दिए । ब्यु वेब्स्टर २९ रनमा जाम्पाको बलमा बोल्ड भए । विल सदरल्यान्डले १६ रन जोड्दा अन्य ब्याट्सम्यानले उल्लेख्य अंक छुन सकेनन् ।

स्टार्सका लागि सन्दीपले ३ विकेट लिँदा अर्का स्पिनर एडम जाम्पा र डेल स्टेनले २-२ विकेट हात पारे । कुल्टर नाइलले १ विकेट लिए ।