काठमाडौं (हाम्रो खेलकुद)-सुनसरीको इनरुवामा जारि मनमोहन मेमोरियल राष्ट्रिय एक दिवसीय क्रिकेट प्रतियोगितामा प्रदेश ५ समूह चरणबाटै बाहिरिएको छ । शुक्रबारको प्रदेश ३ र प्रदेश ५ बीचको खेल वर्षाको कारण नतिजा विहिन टुंगिएपछि प्रदेश ५ बाहिरिएको हो । दुवै टिमले १-१ अंक बाँडेका छन्।

प्रदेश ३ ले दिएको १ सय ९० रनको लक्ष्य पछ्याएको प्रदेश ५ ले २.१ ओभरमा १ विकेट गुमाएर ९ रन बनाएको अवस्थामा वर्षाको कारण खेल रोकिएको थियो । त्यसपछि खेल पुनः सुचारु हुन नसकेपछि दुवै टोलीले अंक बाडेका हुन् ।

त्यसअघि अघि सुनसरीको इनरुवामा टस जितेर ब्याटिङ थालेको प्रदेश ३ को टोली ४५.२ ओभरमा अल आउट हुँदै १ सय ८९ रनमा समेटिएको थियो । प्रदेश ३ का ओपनर तथा कप्तान सुवास खकुरेलले सर्वाधिक ४२ रनको योगदान दिए ।

२५ औं ओभरको तेस्रो बलमा विशाल विक्रम केशीले क्याच आउट गराउनु अघि सुवासले ६५ बलमा ५ चौका प्रहार गरे । ओपनर रित गौतमले २० बलमा ३ चौका र १ छक्का सहित २२ रन जोडे । विकेटकिपर आदिल खानले ४३ बलमा २ चौका र १ छक्का सहित २६, इशान पाण्डेले १२, सोनु तामाङले १५, प्रतिस जिसीले १८, राम नरेश गिरीले १७ र नन्दन यादवले १० रन जोडे ।

प्रदेश ५ का यू १६ का कप्तान विशाल विक्रम केसीले १० ओभरमा २ मेडन सहित ३४ रन खर्चेर ५ विकेट लिए । अनिल खरेल २, कृष्ण कार्की र विक्रम कुमार भुषालले १/१ विकेट लिए ।

पहिलो खेलमा प्रदेश १ सँग ६८ रनले पराजित भएको प्रदेश ५ समूह चरणबाटै बाहिरिएको छ । शनिबार प्रदेश १ र प्रदेश ३ बीच हुने खेलको विजयी हुने टोली समुह सी बाट सेमिफाइनलमा प्रवेश गर्ने छ । वर्षाको कारण खेल रद्द हुँदै अंक बाड्नु परे प्रदेश १ सेमिफाइनलमा पुग्ने समिकरण छ ।