एजेन्सी – उत्कृष्ट लयलाई निरन्तरता दिँदै युवा ब्याट्सम्यान मार्नस लाबुसेनले अविजित शतक प्रहार गरेपछि न्युजिल्यान्डसँगको तेस्रो टेष्टको पहिलो दिन अष्ट्रेलियाले बलियो सुरुवात गरेको छ ।

पहिलो दिनको खेल सकिँदा अष्ट्रेलियाले ९० ओभरमा ३ विकेट गुमाउँदै २ सय ८३ रन बनाएको छ । युवा ब्याट्सम्यान मार्नस लाबुशेन २ सय १० बलमा १२ चौका र १ छक्का सहित १ सय ३० रनमा अविजित छन् । उनको यो टेष्ट करिअरको चौथो शतक हो ।

ओपनर डेविड वार्नरलाई निल वाग्ररले कोलिन डी ग्रान्डहोमबाट ४५ रनमा क्याच आउट गराए । ग्रान्डहोमले जो बर्न्स १८ रनमा रस टेलबाट क्याच गराउँदै पेभिलिएन फर्काएका थिए । तेस्रो विकेटका लागि लाबुशेन र स्टिभ स्मिथले १ सय ५६ रनको साझेदारी गर्दै इनिङ उकासेका थिए ।

स्मिथलाई ग्रान्डहोमले टेलरबाट ६३ रनमा क्याच आउट गराए । स्मिथले १ सय ८२ बलमा ४ चौका प्रहार गरे । स्मिथले ३९ बलमा खाता खोलेका थिए । म्याथ्यु वेड २२ रनमा अविजित छन् । न्युजिल्यान्डका कोलिन डी ग्रान्डहोमले ३ र निल वाग्ररले १ विकेट लिएका छन् ।

पहिलो टेष्टमा अष्ट्रेलिया २ सय ९६ रनले विजयी भएको थियो । दोस्रो टेष्ट अष्ट्रेलियाले २ सय ४७ रनले जित्दै तीन टेष्ट सिरिज २–० ले जिति सकेको छ । अष्टेलिया सिरिज क्विनस्वीप गर्ने सोचमा छ ।