एजेन्सी – अष्ट्रेलियामा जारी विग ब्यास लिगमा मेलबर्न स्टार्सले होबार्ट हरिकेन्सलाई डकवर्थ लेविस पद्धतीको आधारमा ४ रनले हराएको छ ।

जितको लागि ११ ओभरमा ७० रनको लक्ष्य पछ्याएको मेलबर्न स्टार्स ७.३ ओभरमा ५५-३ को अवस्थामा पुन पानी परेपछि नतिजा डकवर्थ लेविसको आधारमा निकालिएको हो । मेलबर्नका ओपनर मार्कस स्टोइनिसले १९ बलमा ३ चौका सहित २५ रनको योगदा दिए । विकेटकीपर पिटर हायान्डस्कम्ब २२ रनमा अविजित रहे । होबार्टका जेम्स फल्कनरले २ विकेट लिए ।

त्यसअघि टस हारेर ब्याटिङ थालेको होबार्टले निर्धारित ११ ओभरमा ५ विकेट गुमाउँदै ६९ रन बनायो । वारम्बार वर्षाको कारण खेल अबरुद्ध हुँदा ११ ओभरमा झारिएको थियो। उसका ओपनर डी आर्सी सटले खातै खोल्न सकेनन् । अर्का ओपनर सिमन माईलन्कोलाई नाथन कुल्टर नाइलले १२ रनमा क्याच आउट गराए ।

कालेब ज्वेलले २८ बलमा २ चौका सहित २६ रनको योगदान दिए । कप्तान बेन म्याकडरमोटले १७ रन जोड्दा डेविड मिलर शून्यमा पेभिलिएन फर्के । जर्ज बिल्ली ७ रनमा अविजित रहे । मेलबर्नका तीब्र गतिका बलर डेल स्टेन र नाथन कुल्टर नाइलले २–२ विकेट लिए । सन्दीपले २ ओभरमा ११ रन खर्चिदा विकेट लिन सकेनन् ।

सन्दीपको दुई ओभर

सातौं ओभरमा सन्दीपले ६ रन खर्चिए । पहिलो बलमा कालेब ज्वेल र दोस्रोमा कप्तान तथा विकेटकीपर बेन म्याकडरमोटलाई १–१ रन दिए । तेस्रो बल डट र चौथोमा दुई रन खर्चिए । पाँचौ र छैटौं बलमा १–१ रन दिए ।

सन्दीपले नवौं ओभरमा ५ रन खर्चिए । कालेब र बेनलाई सुरुवाती दुई बलमा १–१ रन दिए । तेस्रो बल डट राख्दा अन्य तीनै बलमा सन्दीपले १–१ रन खर्चिए ।

मेलबर्नले पहिलो खेलमा ब्रिसबेन हिटलाई २२ रनले पराजित गरेको थियो । दोस्रो खेलमा होबार्ट हरिकेन्सलाई ५२ रनले पराजित गरेको थियो । तेस्रो खेलमा मेलबर्न स्टार्स एडिलेड स्ट्राइकर्ससँग ४ रनले पराजित भएको थियो । पाँचौ खेलमा मेलबर्न स्टार्सले विहीबार सिड्नी थन्डरसँग खेल्ने छ ।