काठमाडौं (हाम्रो खेलकुद) – यूएईका अलराउन्डर रोहन मुस्तफाले पोखरा प्रिमियर लिग (पीपीएल) मा म्यान अफ द सिरिज र म्यान अफ द म्याच घोषित वापत आउने पैसा सहयोग गर्ने भएका छन् ।

चितवन राइनोजलाई अपराजित रहँदै पीपीएल उपाधि जिताउन उत्कृष्ट अलराउन्ड प्रर्दशन गर्दै ६ खेलमा ३ अर्धशतक सहित २ सय ६ रन बनाउनुको साथ ९ विकेट लिएका मुस्तफाले म्यान अफ द म्याचको पैसा मैदानका कर्मचारी र म्यान अफ द सिरिज वापत आउने पैसा च्यारिटीलाई दिने घोषणा गरेका छन् । ६ खेल मध्य मुस्तफा तीनमा म्यान अफ द म्याच चुनिएका थिए । मुस्तफा फाइनलमा विराटनगर, लिग चरणमा काठमाडौं गोल्डेन्स र बुटवल ब्लास्टर्सविरुद्ध म्यान अफ द म्याच चुनिएका थिए ।

प्रत्येक म्यान अफ द म्याचले १० हजार प्राप्त गर्ने छन् । उक्त म्यान अफ द म्याचबाट आएको कुल ३० हजार पोखरा मैदानका कर्मचारीलाई प्रदान गरेका छन् । म्यान अफ द सिरिजबाट पाएको टिभिएस मोटरसाकलबाट आउने पैसा पाकिस्तानमा घर नजिक रहेको एक संस्थालाई दिनेछन् । उक्त संस्थामा ८ देखी १० बालबालिका रहेका छन् । उनले ईदमा ती बालबालिकालाई लुगा तथा मिठाई खुवाउने गरेको उनी बताउँछन् ।

मुस्तफाले भनेका छन्, ‘प्रतियोगिता सकिएपछि मैले पारससँग कुरा गरें । मैले मैदानमा धेरै महिलाले काम गरेको देखे ।नेपालीहरुबाट मैले गज्जबको साथ पाएँ । जुन साँच्चै आश्चर्यजनक र अविश्मरणिय छ । कहिलेकाँही समर्थक फोटो खिच्न होटलनै आउथे ।’

‘ मैदानमा मैले सधैं समर्थकबाट राम्रो साथ र सम्मान पाएँ । मलाई खुसी पार्थे । जसले मलाई राम्रो प्रर्दशन गर्न थप उत्पेरणा मिल्नुको साथै आत्माविश्वास बढायो । गत वर्ष नेपालमा मेरो प्रर्दशन त्यति राम्रो थिएन’, मुस्तफाले भने ।

यसपटक केहि दबाब महसुस गरेको उनी बताउँछन् । मुस्तफाले पारस र हङकङ ब्याट्सम्यान बाबर हायतलाई धन्यावाद दिएका छन् । पारस र बाबरको हौसलाले आत्माविश्वास बढेको र प्रर्दशन राम्रो हुन पुगेको मुस्तफा बताउँछन् ।