पोखरा (हाम्रो खेलकुद) – राष्ट्रिय क्रिकेट टोली तथा काठमाडौं गोल्डेन्सका कप्तान ज्ञानेन्द्र मल्ल दोस्रो संस्करणको पोखरा प्रिमियर लिग(पीपीएल) को उत्कृष्ट ब्याट्सम्यान घोषित भएका छन् ।

चितवन राइनोजका यूएईका अलराउन्डर रोहन मुस्तफा म्यान अफ द सिरिज घोषित भए । चितवनकै करण केसी प्रतियोगिताका सर्वोउत्कृष्ट बलर घोषित भए । एक्स्पर्ट धनगढी ब्लुजका युवा स्पिनर अनिल खरेल उदयमान खेलाडी घोषित भएका छन् । विराटनगर टाइटन्सका युवा ब्याट्सम्यान लोकेश बम मोस्ट भ्यालुएवल खेलाडी घोषित भए । म्यान अफ दि सिरिज रोहन, उत्कृष्ट ब्याट्म्यान ज्ञानेन्द्र र उत्कृष्ट बलर करणले टिभिएस मोटरसाइकल पाएका छन् । यस्तै प्रतियोगिताको मोस्ट भ्यालुएवल खेलाडी लोकेशले १ लाख र उदयमान खेलाडी अनिल खरेलले रु ५० हजार रुपैंया प्राप्त गरे ।

म्यान अफ द सिरिज चुनिएका रोहनले ६ खेलमा २ सय ६ रन बनाउनुको साथै ९ विकेट लिएका थिए । मुस्तफाले पोखरा, काठमाडौं, विराटनगर र बुटवलसँग २-२ विकेट तथा फाइनलमा विराटनगरसँग १ विकेट लिएका थिए । पोखराविरुद्ध ११ रन जोडेका मुस्तफाले बुटवलसँग अविजित ७०, धनगढीविरुद्ध १८ र विराटनगरसँग ७, काठमाडौंसँग अविजित ५९ र फाइनलमा विराटनगरसँग ५० रन बनाएका थिए ।

५ खेलमा १५४.६१ को स्ट्राइक रेटमा १ शतक सहित कुल २ सय १ रन बनाएका काठमाडौं गोल्डेन्स वारियर्सका कप्तान ज्ञानेन्द्र मल्ल उत्कृष्ट ब्याट्सम्यान घोषित भए । पहिलो खेलमा पोखरा पल्टनसँग १ र बुटवल ब्लास्टर्ससँग १५ रनमा आउट भएका ज्ञानेन्द्रले धनगढीविरुद्ध ३८ बलमा ८ चौका र ९ छक्का सहित एक सय रन बनाएका थिए । विराटनगरसँग ४५ र चितवन राइनोजसँग ४० रन बनाएका थिए ।

६ खेलमा १४ विकेट लिएका चितवनका तीब्र गतिका बलर करण केसी प्रतियोगिताको उत्कृष्ट बलर घोषित भए ।  करणले पोखराविरुद्ध १ विकेट लिदा बुटवलविरुद्ध ३.४ ओभरमा ११ रन खर्चेर ४ विकेट लिएका थिए । धनगढीविरुद्ध २, विराटनगरविरुद्ध ३ र काठमाडौंसँग १ विकेट लिदा फाइनलमा विराटनगरविरुद्ध ३ विकेट लिदै शीर्ष स्थानमा रहेका थिए ।

५ खेलमा १७ ओभर बलिङ गर्दै ८५ रन खर्चेर ८ विकेट लिएका एक्स्पर्ट धनगढी ब्लुजका युवा स्पिनर अनिल खरेल उदयमान खेलाडी घोषित भए । विराटनगरसँग एक विकेट लिएका अनिलले काठमाडौंविरुद्ध विहीन बने । चितवन र बुटवलसँग २–२ विकेट लिए । पोखराविरुद्ध ४ ओभरमा १५ रन खर्चेर ३ विकेट लिदै टोलीको जित सहज बनाएका थिए ।

विराटनगर टाइटन्सका युवा ब्याट्सम्यान लोकेश बमले ४ खेलमा ९७ रन बनाएका थिए । उनले लिग चरणमा चितवनसँग ३६ बलमा ५ चौका र ५ छक्का सहित ६२ रन जोडेका थिए ।लोकेशले पोखरासँग २,बुटवलसँग १३, क्वालिफायरमा १९ र फाइनलमा चितवनविरुद्ध १ रनमा आउट भएका थिए ।

चितवनले फाइनलमा विराटनगर टाइटन्सलाई ३२ रनले पराजित गर्दै चितवन च्याम्पियन बनेको हो । यो सँगै च्याम्पियन चितवनले २७ लाख र उप विजेता विराटनगरले १० लाख प्राप्त गरेका छन् ।