पोखरा (हाम्रो खेलकुद) – पोखरा प्रिम्रियर लिग (पीपीएल) को लिग चरणको अन्तिम खेलमा बुटवल ब्लास्टर्सले विराटनगर टाईटन्सलाई १ सय ३४ रनको लक्ष्य दिएको छ ।

बुधबार पोखरा रंगशालामा टस हारेर ब्याटिङ थालेको बुटवल ब्लास्टर्सले निर्धारित २० ओभरमा ८ विकेट गुमाउँदै १ सय ३३ रन बनायो । विराटनगरले अब क्वालिफायरमा स्थान बनाउनका लागि १२.२ ओभरभित्र लक्ष्य प्राप्त गर्नुपर्नेछ । यसो भएमा काठमाडौं क्वालिफायर पुग्नबाट बन्चित हुनेछ ।

बुटवलका लागि भारतीय ब्याट्सम्यान हर्ष टोन्कले सर्वाधिक ६७ रनको योगदान दिए । पहिलो ओभरको दोस्रो बलमै मैदान छिरेका टोन्कले ४४ बलमा ६ चौका र ५ छक्का प्रहार गर्दै इनिङ उकासेका थिए । दिपेश श्रेष्ठको १३ औं ओभरको तेस्रो बलमा ठूलो सट खेल्ने क्रममा टोन्क विकेटकीपर प्रदीप ऐरीबाट उत्कृष्ट क्याच आउट हुन पुगेका थिए ।

बुटवलका प्रमुख ब्याट्सम्यान ओपनर अफ्ताब उद्दीन अहमद पहिलो बलमै गोल्डेन डग आउट भए । किशोर महतोले विकेटकीपर प्रदीप ऐरीबाट क्याच गराएपछि शून्यमा पेभिलिएन फर्केका थिए । दोस्रो विकेटका लागि शंकर राना हर्ष टोन्कले ३२ रनको साझेदारी गर्दै इनिङ उकासे । मोहम्मद जैद आलमको छैटौं ओभरको चौथो बलमा शंकरलाई दिपेश श्रेष्ठबाट २ रनमा क्याच आउट गराए । खराब सट खेल्दै पेभिलिएन फर्किनु अघि शंकरले १४ बलको सामना गरेका थिए । नवौं ओभरको पहिलो बलमा भिम सार्कीलाई साहब आलमले ५ रनमा बोल्ड आउट गरे ।

१२ औं ओभरको दोस्रो बलमा पुनित मेहरालाई छक्का प्रहार गर्दै हर्षले ३७ बलमा अर्ध शतक पुरा गरेका थिए । १२ औं ओभरका टोन्कले पुनितलाई ३ छक्का र १ चौका सहित कुल २४ रन बटुलेका थिए । कप्तान सिद्धान्त लोहनी ११ रनमा बोल्ड आउट भए । १८ औं ओभरको पाँचौ बलमा मोहम्मद जैद आलमले बोल्ड आउट गर्नुअघि सिद्धान्तले २१ बलमा १ छक्का प्रहार गरे । ११ रन जोड्न सिद्धान्तले दुई जीवनदान पाएका थिए ।

दिपेश श्रेष्ठको १५ औं ओभरको अन्तिम बललमा लङ अनमा लोकेश बलमले क्याच छाड्दा लोहनी १ रनमा खेलि रहेका थिए । सिद्धान्तले ब्यक्तिगत ९ रनमा पनि जिवनदान पाएका थिए । १७ औं ओभरको पाँचौ बलमा किशोर महतोलाई दिल स्कुप सट खेल्ने धुनमा पुष थापाले क्याच छाडेका थिए । १९ औं ओभरको दोस्रो बलमा रविन्द्र जंग शाहीलाई किशोरले शून्यमा बोल्ड आउट गरे । अन्तिम ओभरको दोस्रो बलमा जैदले शिबम सिंहलाई नोमन खानबाट ३७ रनमा क्याच आउट गराए । शिबमले २६ बलमा ३ चौका र १ छक्का प्रहार गरे । साम्सद शेख ७ रनमा क्याच आउट भए ।

विराटनगरका लागि पाकिस्तानका मोहम्मद जैद आलमले ४ ओभरमा २० रन खर्चिदै ४ विकेट लिए । किशोर महतोले ४ ओभरमा २२ रन खर्चेर २ विकेट लिए । दीपेश श्रेष्ठले ४ ओभरमा ३० रन खर्चेर १ विकेट लिए । साहब आलमले ४ ओभरमा २४ रन खर्चेर १ विकेट लिए ।