एजेन्सी – भारतले घरेलु मैदानमा हुने श्रीलंकासँगको तीन टि ट्वान्टी तथा अष्ट्रेलियासँगको तीन एक दिवसिय खेलको सिरिजका लागि टोली घोषणा गरेको छ ।

विराट कोहलीको कप्तानीमा घोषणा भएको टोलीमा तीब्र गतिका बलर जसप्रित बुमराह र ओपनर शिखर धवनले टोलीमा पुनरागमन गरेका छन् । शिखर धवन सैद मुस्तफा अली ट्रर्फीको क्रममा घाइते भएका थिए । त्यस्तै बुमराह गत अक्टोबरमा दक्षिण अफ्रिकाको टेष्ट सिरिज घाइते हुन पुगेका थिए । भारतले हालै सकिएको वेस्ट इन्डिजलाई टि ट्वान्टी र वान डे दुबै सिरिज २– १ ले जितेको थियो । भारतले तीब्रका बलर मोहम्मद शामी र उप कप्तान रोहित शर्मालाई श्रीलंकासँगको टि ट्वान्टीको सिरिजमा आराम दिएको छ ।

यता महेन्द्र सिंह धोनी अझैं भारतीय टोलीमा फर्किएका छैनन् । एकदिवसिय विश्वकपको सेमिफाइनलमा न्युजिल्यान्डसँग खेलेका धोनी त्यसयता बाहिर रहँदै आएका छन् । धेरै क्रिकेट विश्लेषकहरुले धोनीले आगमी वर्षको टि ट्वान्टी विश्वकप सम्म खेल्ने इच्छा राखेको बताउँदै आएका छन् । यसबारे धोनीले जनवरीसम्म केहि नबोल्ने बुझिएको छ ।

श्रीलंकासँगको तीन टि ट्वान्टी सिरिज अन्तर्गत पहिलो खेल पुष २०, दोस्रो पुष २२ र तेस्रो तथा अन्तिम खेल पुष २५ मा हुने छ । अष्टे«लियासँगको पहिलो वान डे खेल पुष २९ मा हुने छ । दोस्रो माघ ३ र तेस्रो तथा अन्तिम खेल माघ ५ मा हुने छ ।

श्रीलंकाविरुद्ध भारतीय टोली :

विराट कोहली (कप्तान), शिखर धवन, केएल राहुल, श्रेयस ऐर, मनिष पाण्डे, सञ्जु स्यामसन, ऋषभ पन्त (विकेटकीपर), शिवम दुबे, युजभेन्द्र चहल, कुलदीप यादव, रविन्द्र जडेजा, शार्दुल ठाकुर, नवदीप सैनी, जसप्रित बुमराह र वाशिन्टन सुन्दर

अष्ट्रेलिया विरुद्ध भारतीय टोलीः

विराट कोहली (कप्तान), रोहित शर्मा (उपकप्तान), शिखर धवन, केएल राहुल, श्रेयस ऐर, मनिष पाण्डे, केदार जाधव, ऋषभ पन्त (विकेटकीपर), शिवम दुबे, युजभेन्द्र चहल, कुलदीप यादव, रविन्द्र जडेजा, शार्दुल ठाकुर, मोहम्मद शामी, नवदीप सैनी र जसप्रित बुमराह