पोखरा (हाम्रो खेलकुल) – दोस्रो संस्करणको पोखरा प्रिमियर लिग (पीपीएल) मा घरेलु टोली पोखरा पल्टनले लिग चरणको अन्तिम खेलमा एक्स्पर्ट धनगढी ब्लुजलाई ८० रनको सामान्य लक्ष्य दिएको छ ।

पोखरा रंगशालामा टस जितेर ब्याटिङ गर्ने निर्णय लिएको साविक विजेता पोखरा १६.३ ओभरमा ७९ रनमा अल आउट भएको हो । धनगढीको कसिलो बलिङ र चुस्त फिल्डीङसामु साविक विजेता पोखराका ९ खेलाडीले दोहोरो अंकमा रन जोड्न सकेनन् । दोस्रो ओभरको दोस्रो बलमा कमलसिंह ऐरीले सागर ढकालबाट ओनपर कुशल भुर्तेललाई ६ रनमा क्याच आउट गराए ।

भारतीय तीब्र गतिका बलर दीपक पुनियाको तेस्रो ओभरको तेस्रो बलमा कप्तान शरद भेषावकर हिट विकेट आउट हुँदै ४ रनमा पेभिलिएन फर्के । उनले डिप स्क्वायर लेगतर्फ सट प्रहार गर्नेक्रममा ब्याट स्विङ हुँदै स्टम्पमा लागेको थियो । लगत्तै एक बल पछि पुनियाले पोखराका प्रमुख ब्याट्सम्यान रवि इन्दर सिंहलाई शून्यमा विकेटकीपर सुवेन्दु पाण्डेबाट क्याच आउट गराएपछि पोखरा संकटमा परेको थियो ।

आठौं ओभरको पाँचौ बलमा स्पिनर अनिल खरेलले विकेटकीपर विनोद भण्डारीलाई १२ रनमा बोल्ड आउट गरे । विनोदले १५ बलमा १ चौका प्रहार गरे । दशौं ओभरको दोस्रो बलमा कुशल मल्ल २ रनमा रन आउट हुन पुगे । निरन्तर गुमि रहेको पोखराको विकेट पतन कुनै पनि ब्याट्सम्यानले समाल्न नसक्दा सस्तैमा समेटिएको हो ।

११ औं ओभरको दोस्रो बलमा सागर ढकालले कृष्ण कार्कीलाई दीपकबाट १ रनमा क्याच आउट गराउँदा पोखरा ६८–६ को कमजोर अवस्थामा पुगेको थियो । सागरको यसै ओभरको अन्तिम बलमा ठूलो सट खेल्ने क्रममा रोहित कुमार पौडेल उत्कृष्ट क्याचको शिकार बने । रोहितले लङ अनमा गरेको प्रहार अमित यादवले बाउन्ड्रीमा उत्कृष्ट जम्प हान्दै बचाए र आफू बाउन्ड्रीबाहिर पुग्न लाग्दा मैदानभित्र रहेका फिर्दोस अन्सारीलाई बल दिँदै शून्यमा क्याच गराएपछि पोखराबाट ठूलो योगफलको संभावना टाढिएको थियो ।

१२ औं ओभरको पाँचौ बलमा अनिल खरेलले आशिफ शेखलाई ३२ रनमा एलबीडब्लू आउट गरे । आशिफले २९ बलमा ४ चौका प्रहार गरे । सर्वजीत लड्डा ४ रनमा नट आउट रहे । युवा स्पिनर अनिल खरेलले ४ ओभरमा मात्रै १५ रन खर्चेर ३ विकेट लिए । सागर ढकालले ४ ओभरमा १५ रन खर्चेर २ विकेट लिए । भारतीय तीब्र गतिका बलर दीपक पुनियाले ४ ओभरमा १३ रन खर्चेर २ विकेट लिए । युवा तीब्र गतिका बलर कमल सिंह ऐरीले २.३ ओभरमा २० रन खर्चेर २ विकेट लिए ।