एजेन्सी – श्रीलंकासँगको दोस्रो टेष्ट अन्तर्गत दोस्रो इनिङमा पाकिस्तानका चार ब्याट्सम्यानले शतक प्रहार गरेका छन् । चार ब्याट्सम्यानले शतक प्रहार गरेपछि पाकिस्तानले दोस्रो इनिङमा ५५५–३ मा इनिङ समाप्तीको घोषणा गरेको छ ।

ओपनर शन मसुदले १ सय ९८ बलमा ७ चौका र ३ छक्का सहित १ सय ३५ रनको शतकीय इनिङ खेले । त्यस्तै लगातार दोस्रो टेष्ट खेलमा आविद अलीले २ सय ८१ बलमा २१ चौका र १ छक्का सहित १ सय ७४ रन जोडे । श्रीलंकासँगको पहिलो टेष्टमा डेब्यू खेलमा पनि आबिदले कीर्तिमानी शतक प्रहार गरेका थिए ।

आविद टेष्ट र वान डे दुबैको डेब्यूमा शतक प्रहार गर्ने एक्लो ब्याट्सम्यान हुन् । कप्तान अजहर अली १ सय ५७ बलमा १३ चौका सहित १ सय १८ रनमा स्टम्पिङ आउट भए । युवा ब्याट्सम्यान बाबर आजम १ सय ३१ बलमा ७ चौका र १ छक्का सहित एक सय रनमा अविजित रहे । पहिलो विकेटका लागि आविद र शन मसुदले ६८.३ ओभरमा २ सय ७८ रनको गरेका थिए । त्यस्तै तेस्रो विकेटका लागि अजहर अली र बाबर आजमले १ सय ४८ रनको उत्कृष्ट साझेदारी गरेका थिए ।

टेष्ट इतिहासमा शीर्ष चार ब्याट्सम्यानले शतक प्रहार गरेको यो दोस्रो पटक हो । यस अघि सन् २००७ मा बंगलादेशविरुद्ध भारतका शीर्ष चार ब्याट्सम्यानले शतक प्रहार गरेका थिए । पाकिस्तान पहिलो इनिङमा १ सय ९१ रनमा समेटिएको थियो । सम्रगमा पाकिस्तानले श्रीलंकालाई ४ सय ७६ रनको लक्ष्य दिएको छ । चौथो दिनको खेल सकिदा श्रीलंका २१२–७ को अवस्थामा पुग्दै हार नजिक छ ।

पहिलो इनिङमा श्रीलंका २ सय ७१ रनमा अल आउट भएको थियो । दोस्रो इनिङमा ओशदा फर्नान्डो १ सय ७५ बलमा १३ चौका सहित १ सय २ रनमा खेलि रहेका छन् । उनको यो टेष्ट करिअरको पहिलो शतक हो । पाकिस्तानका लागि युवा बलर नसीम शाहले ३ विकेट लिएका छन् । दुई टेष्टको श्रीखलामा पहिलो टेष्ट ड्र भएको थियो ।