एजेन्सी – मध्यक्रमका ब्याट्सम्यान निकोलस पुरन र कप्तान काइरान पोलार्डले आक्रामक ब्याटिङ गरेपछि वेस्टइन्डिजले भारतविरुद्ध जारी एकदिवसीय अन्तर्राष्ट्रिय सिरिजको अन्तिम खेलमा बलियो लक्ष्य प्रस्तुत गरेको छ ।

कटकस्थित बरबती स्टेडियममा टस हारेपछि पहिलो ब्याटिङको निम्तो पाएको वेस्टइन्डिजले निर्धारित ५० ओभरमा ५ विकेटको क्षतिमा ३ सय १५ रन जोड्यो । पोलार्ड र पुरनले अन्तिम ओभरतिर आक्रामक ब्याटिङ गरेपछि वेस्टइन्डिजले ३ सय रनको आँकडा पार गरेको थियो । अन्तिम ३ ओभरमा मात्र वेस्टइन्डिजले ५३ रन जोडेको थियो ।

ओपनर एभिन लेविसले २१ र शाइ होपले उत्कृष्ट लयलाई कायम राख्दै ४२ रनको योगदान दिएपछि वेस्टइन्डिजले मध्यम सुरुवात पाएको थियो । रोस्टन चेजले ४८ बलमा ३८ र शिम्रन हेटमायारले ३३ बलमा ३७ रन जोड्दै वेस्टइन्डिजको रनगतिलाई अगाडी बढाएका थिए । चेज ३२ औं ओभरको तेस्रो बलमा नवदीप सैनीको बलमा बोल्ड हुँदा वेस्ट इन्डिज १४४-४ को स्थितिमा थियो ।

त्यसपछि पुरन र पोलार्दले पाँचौ विकेटका लागि १ सय ३५ रनको साझेदारी गरे । पुरनले ६४ बलमा ८९ रनको आक्रामक इनिङ खेले । उनले १० चौका र ३ छक्का प्रहार गरेका थिए । कप्तान पोलार्डले ५१ बलमा नटआउट ७४ रन जोड्ने क्रममा ३ चौका ७ छक्का प्रहार गरे । जेसन होल्डर ७ रनमा नटआउट रहे ।

भारतका लागि सैनीले २ विकेट लिँदा शार्दुल ठाकुर, मोहमद शामी र रविन्द्र जडेजाले १-१ विकेट हात पारे । तीन खेलको ओडीआई सिरिजमा पहिलो खेल वेस्टइन्डिज र दोस्रो खेल भारतले जितेको थियो ।