पोखरा (हाम्रो खेलकुद) – सिनियर टोलीका युवा ब्याट्सम्यान आरिफ शेख र भारतीय अलराउन्डर सन्नी पटेलले तल्लोक्रममा आक्रामाक ब्याटिङ गरेपछि दोस्रो संस्करणको पोखरा प्रिमियर लिग (पीपीएल) अन्तर्गत आइतबारको पहिलो खेलमा चितवन राइनोजले विराटनगर टाइटन्सलाई १ सय ४७ रनको लक्ष्य दिएको छ ।

पोखरा रंशालामा टस हारेर ब्याटिङ थालेको चितवन राइनोजले २० ओभरमा ४ विकेट गुमाउँदै १ सय ४६ रन बनायो । तल्लोक्रममा आरिफ शेखले आक्रामक ब्याटिङ गर्दै २२ बलमा ३ चौका र ३ छक्का सहित ३९ रनमा अविजित रहे । सन्नी पटेल ८ बलमा १ चौका र ३ छक्का सहित २७ रनमा अविजित रहे ।

पाँचौ विकेटका लागि मात्रै १६ बलमा आरिफ र सन्नीले ५४ रनको साझेदारी गरेपछि चितवन बलियो योगफलमा पुगेको हो । १९ औं ओभरमा जितेन्द्र मुखियालाई ३ छक्का र १ चौका सहित सन्नी पटेलले कुल २७ रन बटुलेका थिए । सामान्य योगफलतर्फ अग्रसर चितवनलाई यी दुईको ब्याटिङले बलियो योगफलमा पुर्याएको थियो ।

तेस्रो ओभरको पाँचौ बलमा जितेन्द्र मुखियाले ओपनर रोहन मुस्तफालाई विकेटकीपर राजु रिजालबाट ७ रनमा क्याच आउट गराए । मोहम्मद जैद आलमको ११ औं ओेभरको पाँचौ बलमा ठूलो सट खेल्ने धुनमा कप्तान पारस खड्का नोमन खानबाट ३५ रनमा समातिए । पारसले ३८ बलमा ५ चौका प्रहार गरे । दोस्रो विकेटका लागि पारस र बाबर हायतले ४७ रनको साझेदारी गरेका थिए । १४ औं ओभरको अन्तिम बलमा पुनित मेहराले अनिल कुमार शाहलाई ३ रनमा बोल्ड आउट गरे ।

मध्यक्रममा दुई स्पिनर पुनित मेहरा र साहब आलमले कसिलो बलिङ गरेपछि चितवनलाई दबाबमा राखेपनि विराटनगर अन्त्यतिर चुकेको थियो । १८ औं ओभरको दोस्रो बलमा युवा तीब्र गतिका बलर किशोर महतोले बाबरलाई २५ रनमा राजुबाट क्याच गराएपछि थप दबाबमा परेको थियो । बाबरले ३१ बलमा २ चौका प्रहार गरे ।

स्पिनर साहब आलमले ४ ओभरमा १ मेडन सहित १३ रन खर्चिए । पुनित मेहराले ४ ओभरमा १३ रन खर्चेर १ विकेट लिए । जितेन्द्र मुखियाले ४ ओभरमा ५४ रन खर्चेर १ विकेट लिए । मोहम्मद जैद र किशोर महतोको नाममा १-१ विकेट रह्यो ।