पोखरा (हाम्रो खेलकुद) – दोस्रो संस्करणको पोखरा प्रिमियर लिग टि ट्वान्टी क्रिकेट प्रतियोगिता अन्तर्गत शनिवारको खेलमा काठमाडौं गोल्डेन्स वारियर्सले विराटनगर टाइटन्सलाई १ सय ६० रनको लक्ष्य दिएको छ ।

पोखरा रंगशालामा टस जितेर ब्याटिङ थालेको काठमाडौंले निर्धारित २० ओभरमा ५ विकेट गुमाउँदै १ सय ५९ रन बनायो । ओपनर जयकिशन कोल्सावालाले ५५ रनको अर्ध शतकीय इनिङ खेले । पुनित मेहराको १५ औं ओभरको दोस्रो बलमा ठूलो सट खेल्ने क्रममा उनी साहव आलमबाट क्याच आउट हुनु पुगेका थिए । जयकिशनले ४३ बलमा ५ चौका र २ छक्का प्रहार गरे । जयकिशन र कप्तान ज्ञानेन्द्र मल्लले तेस्रो विकेटका लागि ६६ रनको साझेदारी गर्दै इनिङ उकासेका थिए ।

किशोर महतोले पहिलो ओभरको अन्तिम बलमा ओपनर गौरव तोमरलाई शून्यमा साहवबाट क्याच आउट गराए । छैटौं ओभरको अन्तिम बलमा नोमन खानले अमित श्रेष्ठलाई १७ रनमा बोल्ड आउट गरे । अमितले १५ बलमा २ चौका र १ छक्का प्रहार गरे ।

१७ औं ओभरको पाँचौ बलमा पुनितले कप्तान ज्ञानेन्द्रलाई जितेन्द्र मुखियाबाट क्याच गराएपछि अर्ध शतक बनाउन चुकेका थिए । ज्ञानेन्द्रले ३३ बलमा ३ चौका र २ छक्का प्रहार गरे । अन्तिम ओभरको पहिलो बलमा सुवोध भाटीलाई जितेन्द्र मुखियाले नोमनबाट १४ रनमा क्याच आउट गराए । उनले ९ बलमा १ चौका र छक्का प्रहार गरे । आदिल खान १३ र पवन सरार्फ ५ रनमा अविजित रहे ।

विराटनगरका युवा तीब्र गतिका बलर किशोर महतोले ३ ओभरमा १ मेडन सहित ३३ रन खर्चेर १ विकेट लिए । भारतीय स्पिनर पुनित मेहराले ३ ओभरमा १५ रन खर्चेर २ विकेट लिए । नोमन खान र जितेन्द्र मुखियाले १–१ विकेट लिए ।