पोखरा (हाम्रो खेलकुद) – दोस्रो संस्करणको पोखरा प्रिमियर लिग टि ट्वान्टी क्रिकेट प्रतियोगिता अन्तर्गत शुक्रबारको दोस्रो खेलमा चितवन राइनोजले एक्स्पर्ट धनगढी ब्लुजलाई १ सय ८२ रनको लक्ष्य दिएको छ ।

पोखरा रंगशालामा टस जितेर ब्याटिङ थालेको चितवनले २० ओभरमा ५ विकेट गुमाउँदै १ सय ८१ रन बनायो । चितवनको लागि आरिफ शेख २० बलमा २ चौका र ४ छक्का सहित ४७ रनमा अविजित रहे । त्यस्तै सन्नी पटेल १७ बलमा १ चौका र ३ छक्का सहित ३२ रनमा अविजित रहे । छैटौं विकेटका लागि आरिफ र सन्नीले ५ ओभरमा ७२ रनको आक्रामक साझेदारी गरेका थिए ।

आरिफले ब्यक्तिगत १४ रनमा जीवनदान पाएका थिए । १८ औं ओभरको पहिलो बलमा कमल सिंह ऐरीले आरिफलाई क्याच आउट गराएपनि थर्ड एम्पारले नो बल दिएपछि जीवनदान पाएका थिए ।

कप्तान दीपेन्द्र सिंह ऐरीले पाँचौ ओभरको तेस्रो बलमा ओपनर रोहन मुस्तफालाई ९ रनमा एलबी डब्लू आउट गरे । सातौं ओभरको चौथो बलमा युवा स्पिनर अनिल खरेलले कप्तान पारस खड्कालाई दीपेन्द्रबाट २३ रनमा क्याच आउट गराए । ठूलो सट खेल्ने धुनमा क्याच आउट हुनुअघि पारसले १५ बलमा २ चौका र १ छक्का प्रहार गरे । नवौं ओभरको पाँचौ बलमा हरि शंकर शाहलाई अनिल खरेललेनै अमित यादवबाट ८ रनमा क्याच आउट गराए ।

१३ औं ओभरको चौथो बलमा अमित यादवले दीपेन्द्रबाट बाबर हायतलाई ३६ रनमा क्याच आउट गराए । बाबरले २८ बलमा ३ चौका र २ छक्का प्रहार गरे । १५ औं ओभरको अन्तिम बलमा अनिल कुमार शाहलाई दीपेन्द्रले अमितबाट १९ रनमा क्याच आउट गराए ।

धनगढीका युवा स्पिनर अनिल खरेलले ४ ओभरमा १८ रन खर्चेर २ विकेट लिए । दीपेन्द्र सिंह ऐरीले ४ ओभरमा ४१ रन खर्चेर २ विकेट लिए । अमित यादवको नाममा १ विकेट रह्यो ।