पोखरा (हाम्रो खेलकुद) – दोस्रो संस्करणको पोखरा प्रिमियर लिग टि ट्वान्टी क्रिकेट प्रतियोगिता अन्तर्गत शुक्रबारको पहिलो खेलमा पोखरा पल्टनले बुटवल ब्लास्टर्सलाई १ सय २२ रनको मध्यम लक्ष्य दिएको छ ।

पोखरा रंगशालामा टस हारेर ब्याटिङ थालेको पोखराले निर्धारित २० ओभरमा ५ विकेट गुमाउँदै १ सय २१ रन बनायो । पोखराको लागि भारतीय ब्याट्सम्यान रविइन्दर सिंह ४२ बलमा २ चौका र २ छक्का सहित ४५ रनमा अविजित रहे । त्यस्तै प्रथामेश दाके २० बलमा १ चौका र १ छक्का सहित २० रनमा नट आउट रहे । खराब सुरुवात गरेको पोखरालाई मध्यम अवस्थामा पुर्याउन रविइन्दर र प्रथामेशले छैटौं विकेटका लागि अविजित ५२ रनको साझेदारी गरे ।

पहिलो आभेरको दोस्रो बलमै ओपनर कुशल भुर्तेललाई ललित सिंह भण्डारीले शून्यमा एलबी डब्लू आउट गरे । चौथो ओभरको तेस्रो बलमा कप्तान शरद भेषावकरलाई हर्ष टोन्कले लङ अनमा विपिन खत्रीबाट ७ रनमा क्याच आउट गराए । छैटौं ओभरको तेस्रो बलमा हर्ष टोन्कले विकेटकीपर विनोद भण्डारीलाई अफ्ताब उदीन अहमदबाट ३ रनमा क्याच आउट गराएपछि पोखरा दबाबमा परेको थियो ।

आठौं ओभरको पाँचौ बलमा ओपनर इशान पाण्डेलाई शिवम सिंहले कप्तान सिद्धान्त लोहनीबाट १३ रनमा क्याच आउट गराए । उनले १९ बलमा १ चौका प्रहार गरे । १४ अौं ओभरको दोस्रो बलमा नितेश थापाले रोहित कुमार पौडेललाई १९ रनमा बोल्ड आउट गरे । रोहितले १८ बलमा १ चौका र १ छक्का प्रहार गरे । बुटवलका हर्ष टोन्कले ४ ओभरमा १० रन खर्चेर २ विकेट लिए । ललितसिंह भण्डारी, शिवम सिंह र नितेश थापाले १–१ विकेट लिए ।

आजको खेलमा सिद्धान्त लोहनीले बुटवलको कप्तानी गरेका छन् । चोटसँग जुधि रहेका सोमपाल कामी नखेलेपछि सिद्धान्तले कप्तानी गरेका हुन् । योसँगै सिद्धान्तले ६ महिनापछि घरेलु मैदानमा कप्तानको भुमिकाबाट पुनरागमन गरेका छन् ।