एजेन्सी – ओपनर रोहित शर्मा र लोकेश राहुलको सानदार शतक तथा युवा स्पिनर कुलदीप यादवको ह्याट्रिकसँगै वेस्ट इन्डिजसँगको तीन ओडीआई सिरिज अन्तर्गत दोस्रो खेलमा भारत १ सय ७ रनले विजयी भएको छ । ३ सय ८८ रनको विशाल लक्ष्य पछ्याएको वेस्ट इन्डिज ४३.३ ओभरमा अल आउट हुँदै २ सय ८० रनमा समेटियो ।

वेस्ट इन्डिजका लागि विकेटकीपर शाई होप ७८ र निकोलस पूरनले ७५ रनको योगदान दिए । चौथो विकेटका लागि शाइ र पूरनले १ सय ६ रनको शतकीय साझेदारी गरेका थिए । यी दुईबीचको साझेदारी ३० औं ओभरको दोस्रो बलमा पूरनलाई मोहम्मद शामीले कुलदीप यादवबाट क्याच गराउँदै तोडेका थिए । पूरनले ४७ बलमा ६ चौका र ६ छक्का प्रहार गरे ।

कप्तान काइरोन पोलार्ड गोल्डेन डक आउट भए । विराट कोहली पनि गोल्डेन डक आउट भएका थिए । एकै खेलमा दुबै टोलीका कप्तान गोल्डेन डक आउट भएको यो पहिलो पटक हो । कुलदीपले ३३ ओभरको चौथो बलमा शाईलाई विराटबाट क्याच आउट गराए । उनले ८५ बलमा ७ चौका र ३ छक्का प्रहार गरे ।

लगत्तै अर्को बलमा जोसन होल्डरलाई कुलदीपले ऋषभबाट स्टम्पिङ आउट गराए । अन्तिम बलमा अल्जारी जोशेफलाई केदार जाधवबाट शून्यमा क्याच आउट गराउँदै ह्याट्रिक पुरा गरेका थिए । यो कुलदीपको दोस्रो ह्याट्रिक हो । यस अघि कुलदीपले सन् २०१७ मा अष्ट्रेलियाविरुद्ध पनि ह्याट्रिक गरेका थिए ।

ओपनर इभिन लुईस ३०, शिमरोन हेटमायर र रोश्टन चेश समान ४ रनमा आउट भए । तल्लोक्रममा किमो पलले ४२ बलमा ४ चौका र ३ छक्का सहित ४६ रन जोड्दै हारको अन्तर घटाए । खारी पियरेले २१ रन जोडे । भारतका लागि मोहम्मद शामीले ७.३ ओभरमा ३९ रन खर्चेर ३ विकेट लिए । स्पिनर कुलदीप यादवले ह्याट्रिक सहित १० ओभरमा ५२ रन खर्चेर ३ विकेट लिए । रविन्द्र जडेजा २ र सार्दुल ठाकुरको नाममा १ विकेट रह्यो ।

त्यस अघि टस हारेर ब्याटिङ थालेको भारतले निर्धारित ५० ओभरमा ५ विकेट गुमाउँदै ३ सय ८७ रन बनाएको थियो । विशाल योगफल बनाउन ओपनर रोहित शर्मा र लोकेश राहुलले सानदार शतक प्रहार गरे । रोहितले १ सय ३८ बलमा १७ चौका र ५ छक्का सहित १ सय ५९ रनको शानदार शतकीय इनिङ खेले ।

रोहितलाई ४४ औं ओभरको तेस्रो बलमा शेल्डन कट्टेले शाइ होपबाट क्याच आउट गराए । ओडीआई करिअरको यो रोहितको २८ औं शतक हो । त्यस्तै अर्का ओपनर लोकेशले १ सय ४ बलमा ८ चौका र ३ छक्का सहित १ सय २ रनको योगदान दिए । राहुलको यो ओडीआई करिअरको तेस्रो शतक पर्दछ ।

रोहित र लोकेशले ३७ ओभर सम्म २ सय २७ रनको साझेदारी गर्दै विशाल योगफलतर्फ अघि बढाएका थिए । यी दुईबीचको दोहोरो शतकीय साझेदारी अज्जारी जोशेफले रोश्टन चेशबाट राहुललाई क्याच गराउँदै तोडेका थिए । कप्तान विराट कोहलीलाई ३८ औं ओभरको तेस्रो बलमा काइरोन पलार्डले रोश्टन चेशबाट क्याच गराउँदै गोल्डेन डक आउटको शिकार बनाए ।

तल्लोक्रममा श्रेयस ऐरले ३२ बलमा ३ चौका र ४ छक्का सहित ५३ रन जोडे । त्यस्तै ऋषभ पन्तले १६ बलमा ३ चौका र ४ छक्का प्रहार गर्दै ३९ रन जोडे । केदार जाधव १६ रनमा नट आउट रहे । वेस्ट इन्डिजका युवा तीब्र गतिका बलर शेल्डन कट्टेलले ९ ओभरमा ८३ रन खर्चेर २ विकेट लिए । अल्जारी जोशेफ, किमो पल र कप्तान काइरोन पोलार्डले १–१ विकेट लिए ।

पहिलो खेलमा भारत वेस्ट इन्डिजसँग ८ विकेटले पराजित भएको छ । योसँगै तीन ओडीआई सिरिज १–१ को अवस्थामा पुगेको छ । तेस्रो तथा अन्तिम खेल आइतबार हुने छ ।