पोखरा (हाम्रो खेलकुद) – भारतीय अलराउन्डर पुनित मेहराले आक्रामक ब्याटिङ गरेपछि दोस्रो संस्करणको पोखरा प्रिमियर लिग टि ट्वान्टी क्रिकेट प्रतियोगिता अन्तर्गत बुधबारको दोस्रो खेलमा विराटनगर टाइटन्सले पोखरा पल्टनलाई १ सय ४६ रनको मध्यम लक्ष्य दिएको छ ।

पोखरा रंगशालामा टस हारेर ब्याटिङ थालेको विराटनगरले २० ओभरमा ५ विकेट गुमाउँदै १ सय ४५ रन बनायो । कमजोर अवस्थामा रहेको विराटनगरलाई मध्यम योगफल सम्म पुर्याउन पुनितले २६ बलमा ५ चौका र ४ छक्का सहित ६१ रनमा अविजित रहे । राजु रिजाल ९ रनमा अविजित रहे । छैटौं विकेटका लागि पुनित र राजुले ५.१ ओभरमा ६९ रनको अविजित साझेदारी गर्दै प्रतिस्पर्धात्मक योगफलमा पुर्याएका हुन् ।

पुनितले १९ औं ओभरमा राशिद खान र २० औं ओभरमा प्रथामेथ डाकेलाई समान २२ रन जोडेका थिए । पुनितले १९ औं ओभरमा राशिदलाई समान २ चौका र छक्का प्रहार गरे । अन्तिम ओभरमा दाकेलाई पुनितले २ छक्का र १ चौका प्रहार गरे ।

ओपनर सुनिल धमला र मोहम्मद जैद आलमले पहिलो विकेटका लागि ५० रनको साझेदारी गर्दै राम्रो सुरुवात दिलाएका थिए । नवौं ओभरको दोस्रो बलमा कुशल मल्लले प्रथामेथ दाकेबाट लङअनमा जैदलाई २६ रनमा क्याच आउट गराउँदै साझेदारी तोडेका थिए । जैदले २७ बलमा समान २ चौका र छक्का प्रहार गरे ।

१४ औं ओभरको पहिलो बलमा सवैजीत लड्डाले ओपनर सुनिल धमलालाई कप्तान शरद भेषावकरबाट ३६ रनमा क्याच आउट गराए । धमलाले ४० बलमा समान २ चौका र छक्का प्रहार गरे । लगत्तै अर्को बलमा कप्तान प्रदीप ऐरी ६ रनमा रन आउट हुन पुगे । शरदको १५ औं ओभरको दोस्रो बलमा ठूलो सट खल्न खोज्दा नोमन खान आशिफ शेखबाट १ रनमा क्याच आउट भए ।

यसै ओभरको पाँचौ बलमा लोकेश बमलाई शरदले एलबी डब्लू आउट गर्दै २ रनमा पेभिलिएन फर्काए । लोकेशको यो फ्रेन्चाइज लिगमा डेब्यू खेल हो । पोखराका कप्तान शरद भेषावकरले २ ओभरमा १६ रन खर्चेर २ विकेट लिए । कुशल मल्ल र सर्वजीत लड्डाको नाममा १–१ विकेट रह्यो ।