पोखरा (हाम्रो खेलकुद) – कप्तान ज्ञानेन्द्र मल्लको विश्फोटक शतकसँगै दोस्रो संस्करणको पोखरा प्रिमियर लिग टि ट्वान्टी क्रिकेटमा काठमाडौं गोल्डेन्स वारियर्सले एक्स्पर्ट धनगढी ब्लुजलाई १ सय ८६ रनको विशाल लक्ष्य दिएको छ ।

पोखरा रंगशालामा टस हारेर ब्याटिङ थालेको काठमाडौं गोल्डेन्स वारियर्सले निर्धारित १७ ओभरमा ५ विकेट गुमाउँदै १ सय ८५ रन बनायो । हुस्सुको कारण निर्धारित समय भन्दा केहि ढिला खेल सुरु हुँदा खेल १७ ओभरमा झारिएको थियो ।

काठमाडौंलाई विशाल योगफल सम्म पुर्याउन कप्तान ज्ञानेन्द्र मल्लले ३८ बलमा ८ चौका र ९ छक्का सहित १ सय रनको योगदान दिए । पीपीएलमा शतक प्रहार गर्ने ज्ञानेन्द्र पहिलो ब्याट्सम्यान बनेका छन् । ज्ञानेन्द्र अन्तिम ओभरको तेस्रो बलमा सन्दीप जोराबाट क्याच हुन पुगेका थिए ।

मैदानमा छक्का र चौकाको वर्षा बनाएका ज्ञानेन्द्रले ३७ बलमा पीपीएलको पहिलो शतक प्रहार गरेका थिए । ज्ञानेन्द्रले १७ औं ओभरको पहिलो बलमा कमल सिंह ऐरीलाई १ रन लिदै शतक पुरा गरेका थिए ।

जयकिशन कोल्सावाले ३७ बलमा ४ चौका र २ छक्का सहित ४६ रनको योगदान दिए । तेस्रो विकेटका लागि ज्ञानेन्द्र र जयकिशनले १ सय ३१ रनको शतकीय साझेदारी गरेपछि विशाल योगफलमा पुगेको हो । ज्ञानेन्द्रले १३ औं ओभरको पाँचौ बलमा बिक्रम ठगुन्नालाई छक्का प्रहार गर्दै २४ बलमा अर्ध शतक पुरा गरेका थिए ।

काठमाडौंका ओपनर गौरव तोमरलाई पहिलो ओभरको तेस्रो बलमै कमल सिंह ऐरीले दिपेन्द्र सिंह ऐरीबाट क्याच गराउँदै शून्यमा पेभिलिएन फर्काए । दोस्रो विकेटका लागि जयकिशन कोल्सावाला र अमित श्रेष्ठले ५० रनको साझेदारी गर्दै इनिङ उकासेका थिए । सागर ढकालको बलमा ठूलो सट खेलेका अमितलाई मिड विकेटको वाउन्ड्री लाइन नजिकै उत्कृष्ट डाइभ हान्दै क्याच लिएपछि ३४ रनमा पेभिलिएन फर्केका थिए । उनले २१ बलमा ६ चौका र १ छक्का प्रहार गरे ।

११ औं ओभरको दोस्रो बलमा जयकिशनले सट थर्डम्यानमा प्रहार गरेको सट अनिल खरेलले क्याच छाड्दै २६ रनमा जिवनदान दिएका थिए ।

१२ औं ओभरमा ज्ञानेन्द्रले दीपेन्द्र सिंह ऐरीलाई २ छक्का र १ चौका सहित कुल २० रन जोडेका थिए । ज्ञानेन्द्रले १३ औं ओभरको पाँचौ बलमा बिक्रम ठगुन्नालाई छक्का प्रहार गर्दै २४ बलमा अर्ध शतक पुरा गरेका थिए । विश्फोटक ब्याटिङ गरेका ज्ञानेन्द्रले १३ औं ओभरमा बिक्रम ठगुन्नालाई समान २ चौका र छक्का सहित २१ रन जोडेका थिए ।

१४ औं ओभरमा ज्ञानेन्द्रले अमित यादवलाई ३ छक्का सहित २१ रन जोडेका थिए । धनगढीका लागि कमल सिंह ऐरीले ४ ओभरमा ३७ रन खर्चेर ४ विकेट लिए । सागर ढकालको नाममा १ विकेट रह्यो ।