पोखरा (हाम्रो खेलकुद) – दोस्रो संस्करणको पोखरा प्रिमियर लिग (पीपीएल) मा बुधबारको दोस्रो खेलमा पोखरा पल्टन र विराटनगर टाइटन्स भिड्दै छन् । खेल १२:४५ बजेदेखी पोखरा रंगशालामा सुरुहुने छ ।

पोखरा दोस्रो जितको खोजिमा छ । पहिलो खेलमा काठमाडौं गोल्डेन्स वारियर्सलाई ९ विकेटले हराएको पोखरा दोस्रो खेलमा चितवन राइनोजसँग ६ विकेटले पराजित हुन पुगेको थियो । विराटनगर पहिलो खेलमा एक्स्पर्ट धनगढी ब्लुजसँग ५ रनको झिनो अन्तरले पराजित भएको थियो । शरद भेषावकर कप्तान रहेको पोखरा दोस्रो र प्रदीप ऐरी कप्तान रहेको विराटनर पहिलो जित निकाल्ने सोचमा छन् ।

विराटनरले धनगढीविरुद्ध बलिङमा उत्कृष्ट प्रर्दशन गरेपनि ब्याटिङमा कमजोर प्रर्दशन गर्दा झिनो अन्तरको हार बेहोर्नु परेको थियो । विराटनगरका स्पिनर साहव आलमले ३ र पाकिस्तानका युवा अलराउन्डर नोमन खानले २ विकेट लिएपछि धनगढी ८ विकेट गुमाउँदै १ सय १७ रन बनाएको थियो । जवाफी लक्ष्य पछ्याएको विराटनगरले २० ओभरमा ९ विकेट गुमाउँदै १ सय १२ रन मात्र बनाएको थियो ।

डेथ ओभरमा रन जोड्न नसक्दा पराजित हुन पुगेको थियो । उसका दुबै ओपनर दिलिप नाथ र मोहम्मद जैद आलमले खाता खोल्न सकेका थिएनन् । आज राजेश पुलामी मगर वा दिलिप मध्य एकको स्थानमा यू१९ टोलीका युवा ब्याट्सम्यान लोकेश बलले मौका पाउन सक्ने संभावना रहन्छ ।

पोखराले चितवनविरुद्ध ब्याटिङमा कमजोर प्रर्दशन गरेको थियो । पोखराका कप्तान शरद भेषावकरले ४५ रन जोड्नु बाहेक अन्यको प्रर्दशन राम्रो हुन सकेन । रविइन्दर सिंह १० रनमा आउट हुँदा कमजोर योगफल तयार पारेको थियो । पोखराले रोहित कुमार पौडेलको स्थानमा अलराउन्डर कृष्ण कार्कीलाई मैदान उतार्न सक्ने संभावना रहन्छ ।

विराटनगरको टोली:

प्रदीप ऐरी (कप्तान), दिलिप नाथ (विकेटकीपर), दीपेश श्रेष्ठ, जितेन्द्र मुखिया, किशोर महतो, लब कामत, मिनाश थापा, पुष्प थापा, राजेश पुलामी मगर, राजु रिजाल , साहब आलम, सुनिल धमला, लोकेश बम, पुनित मेहरा (भारत) मोहम्मद जैद आलम र नोमन खान (पाकिस्तान)।

पोखरा पल्टनको टोली:

शरद भेषावकर (कप्तान) रोहित कुमार पौडेल, विनोद भण्डारी (विकेटकीपर), ललित नारायण राजवंशी, राशिद खान, कृष्ण कार्की, कुशल भुर्तेल, महबुब आलम, आशिफ शेख, इशान पाण्डे, कुशल मल्ल, आकाश चन्द, अनिल गुरुङ, रविइन्दर सिंह, सर्वतीत लड्डा र प्रथामेश दाके ।