पोखरा (हाम्रो खेलकुद) – दोस्रो संस्करणको पोखरा प्रिमियर लिग (पीपीएल) अन्तर्गत बुधबार पहिलो खेलमा काठमाडौं गोल्डेन्स वारियर्स र एक्स्पर्ट धनगढी ब्लुजबीच प्रतिस्पर्धा हुँदै छ । खेल विहान ९ बजेबाट पोखरा रंगशालमा रहेको क्रिकेट मैदानमा सुरु हुने छ ।

ज्ञानेन्द्र मल्ल कप्तान रहेको काठमाडौंलाई अघिल्लो चरणको आशा कायमै राख्न आजको खेल जित्नै पर्ने हुन्छ । आजको खेलमा पराजित भए काठमाडौंको झिनो अंक गणितीय संभावना मात्रै बाँकी रहने देखिन्छ । पहिलो खेलमा पोखरा पल्टनसँग ९ विकेटले पराजित भएको काठमाडौं दोस्रो खेलमा बुटवल ब्लास्टर्ससँग सुपर ओभरमा पराजित भएको थियो ।

पहिलो खेलमा कमजोर ब्याटिङ गरेको काठमाडौंले तुलनात्मक रुपमा दोस्रो खेलमा सुधारिएको प्रर्दशन गरेको थियो । बुटवलविरुद्ध पवन सरार्फले २१ बलमा ३ चौका र २ छक्का सहित ३७ रन जोडेका थिए । जुन खेलमा सुवोध भाटी शून्य र गौरव तोमर १ रनमा आउट हुँदा काठमाडौंले ठूलो योगफल बनाउन चुकेको थियो । कप्तान ज्ञानेन्द्र मल्लले दुबै खेलमा खराब ब्याटिङ गरेका छन् । पोखराविरुद्ध १ रनमा बोल्ड आउट भएका ज्ञानेन्द्र बुटवलविरुद्ध १५ रनमा क्याच आउटको शिकार बन्न पुगेका थिए ।

कप्तान ज्ञानेन्द्रले रन जोड्न नसक्दा टोली केहि दबाबमा देखिन्छ । ज्ञानेन्द्रलाई आजको खेलमा ठूलो इनिङ खेल्न दबाब छ । प्रमुख तीन स्पिनरलाई बुटवलविरुद्ध मैदान उतारेको काठमाडौंले आज सुर्य तामाङलाई बेन्चमा राख्दै अमृत भट्टाइलाई मौका दिन सक्छ । पिच स्पिनर उपयोगी हुँदा तीनै स्पिनरको संभावना छ ।

यता धनगढीले विराटनरमाथि ५ रनको रोमान्चक जित निकालेको थियो । कप्तान दिपेन्द्र सिंह ऐरीले अन्तिम ओभरमा उत्कृष्ट बलिङ गरेपछि धनगढीको जित संभव बनेको थियो । बलिङमा उत्कृष्ट प्रर्दशन गरेको धनगढीले ब्याटिङमा भने कमजोर प्रर्दशन गरेको थियो । दिपेन्द्र शून्यमा आउट भएका थिए । धनगढीका तल्लोक्रमका कमल सिंह ऐरीले आक्रामक ब्याटिङ गरेका थिए ।

विराटनगरविरुद्ध धनगढीका तीनै विदेशी खेलाडी रोड्रिगो थोमस, श्रीमन्था विजयरत्ने र अमित यादवले राम्रो प्रर्दशन गर्न सकेका थिएनन् । यी तीन विदेशी खेलाडीबाट ठूलो आशा गरिएको छ । यी तीन विदेशी खेलाडीसँगै दिपेन्द्र धनगढीका प्रमुख हतियार हुन् । पहिलो खेलमा धनगढीको ब्याटिङ कमजोर देखिएको थियो । ब्याटिङ लाइन अप बलियो बनाउन धनगढीले आज सन्दीप रजालीलाई मैदान उतार्न सक्छ । बलिङमा भने आज धनगढीमा परिवतर्नको संभावना न्युन रहेको छ ।

धनगढीको टोली :

दीपेन्द्र सिंह ऐरी (कप्तान), मञ्जित श्रेष्ठ, रोबिन क्षेत्री, सन्दीप सुनार, कमलसिंह ऐरी, सागर ढकाल, सन्दीप जोरा, फिर्दोस अन्सारी, सौरव खनाल, विक्रम ठगुन्ना, सन्दीप रजाली, सुनम गौतम, अनिल खरेल, सुवेन्दु पाण्डे, अरुण ऐरी, अमित यादव, श्रीमन्ता विजयरत्ने र रोड्रिगो थोमस ।

काठमाडौंको टोली :

ज्ञानेन्द्र मल्ल (कप्तान), पवन सरार्फ, सुसन भारी, पृथु बास्कोटा, अमर सिंह राउटेला, आदिल खान, नन्दन यादव, वसन्त रेग्मी, अमित श्रेष्ठ, सुवास खकुरेल, अमृत भट्टाई, सुर्य तामाङ, गौरव तोमर, जयकिशन कोल्सावाला र सुवोध भाटी ।