एजेन्सी – पाकिस्तानका ओपनर आबिद अलीले विश्व कीर्तिमानी कायम गरेका छन् । आबिदले श्रीलंकासँगको पहिलो टेष्टमा शतक प्रहार गर्दै इतिहास रचेका हुन् । उनको विश्व कीर्तिमानी शतकसँगै पाकिस्तान र श्रीलंकासँगको पहिलो टेष्ट ड्र भएको छ ।

आइतबार पहिलो टेष्टमा आबिद २ सय १ बलमा ११ चौका सहित १ सय ९ रनमा अविजित रहे । उनको यो टेष्ट डेब्यू शतक हो । यस अघि आबिदले ओडीआई डेब्यू खेलमा पनि शतक प्रहार गरेका थिए । गत मार्चमा अष्ट्रेलियासँगको चौथो ओडीआई खेलमा डेब्यू गर्दै १ सय १२ रन जोडेका थिए । ओडीआई र टेष्ट दुबैको डेब्यूमै शतक प्रहार गर्ने आबिद विश्वकै पहिलो ब्याट्सम्यान बनेका छन् ।

श्रीलंकाले ३०८–६ को अवस्थामा पहिलो इनिङ समाप्तीको घोषणा गरेको थिए । श्रीलंका धनञ्जय डी शिल्भाले १ सय २, कप्तान दिमुथ करुणारत्ने ५९ र ओसदा फर्नान्डो ४० रन जोडेका थिए । पाकिस्तानका युवा तीब्र गतिका बलर नसीम शाह र शाहिन शाह अफ्रिदीले २–२ विकेट लिए ।

पाकिस्तानले ७० ओभरमा २ सय ५२ रन जोड्न २ विकेट गुमाएको अवस्थामा पाँचौ दिनको खेल सकिएपछि खेल ड्र भएको हो । पाकिस्तानका आबिदसँगै युवा ब्याट्सम्यान बाबर आजमले पनि उत्कृष्ट शतक प्रहार गरे । बाबर १ सय २८ बलमा १४ चौका सहित १ सय २ रनमा अविजित रहे । बाबरलेको पाकिस्तान यो पहिलो टेष्ट शतक हो । उनको टेष्ट करिअरको भने तेस्रो शतक पर्दछ । पाकिस्तान र श्रीलंकाबीच दोस्रो तथा अन्तिम टेष्ट विहीबार देखी कराँचीमा सुरु हुने छ ।