काठमाडौं (हाम्रो खेलकुद) – युवा हिटर सिद्धान्त लोहनीले पोखरा प्रिमियर लिग टि ट्वान्टी क्रिकेटबाट घरेलु क्रिकेटमा पुनरागमन गर्दै छन् । सोमपाल कामी कप्तान रहेको बुटवल ब्लास्टर्सको टोलीमा रहेका सिद्धान्तले घरेलु क्रिकेटमा ६ महिनापछि पुनरागमन गर्न लागेका हुन् ।

गत जेठ तेस्रो सातामा प्रधानमन्त्री राष्ट्रिय एक दिवसिय क्रिकेट प्रतियोगितामा प्रदेश १ बाट कर्णाली प्रदेशविरुद्ध टियु क्रिकेट मैदानमा खेल्नेक्रममा खुट्टामा चोट लागेपछि ६३ रनको स्थितिमा मैदान छाडेका थिए । पछि उनले लिगामेन्टको शल्यक्रिया गरेपछि ४ महिना मैदानबाहिर रहनु पर्यो ।

पीपीएलबाट पुनरागमन गर्न लागेका सिद्धान्तले आफु फिट भएको बताएका छन् । ‘मेरा लागि राम्रो अवसर हो । पहिलाको जस्तो पूर्णरुपमा अझैं खुलेको छैन, अभ्यासमा ब्याटिङ पनि गरिरहेको छु, कुनै गाह्रो छैन । मैले उत्कृष्ट प्रर्दशन गर्न हरप्रयास गर्ने छु’, उनले हाम्रो खेलकुदसँग भने ।

सिद्धान्तले गत वर्ष नेपाल पुलिस क्लब छाडेर प्रदेश १ टोलीमा फर्किएका थिए । पुलिस टोलीमा ओझेलमा परेपछि आफुलाई प्रमाणित गर्न प्रदेश टोलीमा फर्किएको बताउँछन् । पुलिस क्लब छाड्दा उत्कृष्ट प्रर्दशन गर्न थप दबाब रहेको उनको बुझाइ छ ।

सन् २०१५ मा आईसीसी टि ट्वान्टी विश्वकप छनोट अन्तर्गत जर्सीविरुद्ध डेब्यूमै हेलिकप्टर सट सहित २७ रन जोडेपछि उनको चर्चा रातारात चुलिएको थियो । त्यसयता भने सिद्धान्त आफ्नो परिचय सिद्ध गर्न नै संघर्षरत छन् । उनले घरेलु क्रिकेटमा लगातार कमजोर प्रर्दशन गर्दै आएका छन् ।