काठमाडौं (हाम्रो खेलकुद) – नमस्ते पोखरा प्रिमियर लिग (पीपीएल) को विजेताले २७ लाख प्राप्त गर्ने भएको छ ।

आयोजक क्विन्स इभेन्ट म्यानेजमेन्ट प्रालिले एक प्रेस विज्ञप्ती जारी गर्दै पुरस्कार राशि घोषणा गरेको हो । मंसिर २८ गतेदेखि पुस १२ गतेसम्म चल्ने प्रतियोगितामा नेपालका ६ सहरका ६ फ्रेञ्चाइज टिमहरुको सहभागिता रहनेछ । विराटनगर टाइटन्स, पोखरा पल्टन, बुटवल ब्लास्टर्स, चितवन राइनोज, काठमाडौं गोल्डेन वारीयर्स र धनगढी ब्लुज छन् ।

पीपीएलको विजेताले २७ लाख र उपविजेताले १० लाख रुपैयाँ प्राप्त गर्ने छन् । गत वर्षको च्याम्पियन पोखरा पल्टनले फाइनलमा चितवनलाई हराउँदै नगद २७ लाख रुपैयाँ प्राप्त गरेको थियो । उपविजेता चितवन राइनोजले १० लाख चित्त बुझाएको थियो ।

प्रतियोगिताका उत्कृष्ट तीन खेलाडीले मोटरसाइकल प्राप्त गर्ने छन् । म्यान अफ दि सिरिज, उत्कृष्ट ब्याट्म्यान र उत्कृष्ट बलरलाई जगदम्बा मोटर्सले उपलब्ध गराउने टिभिएस मोटरसाइकल प्रदान गर्ने जनाएको छ ।

यस्तै प्रतियोगिताको मोस्ट भ्यालुएवल खेलाडीलाई १ लाख र उदयमान खेलाडीलाई रु ५० हजार रुपैंया साथै प्रत्येक खेलमा नेपाल टेलिकम म्यान अफ दि म्याच हुने खेलाडीलाई १० हजार प्राप्त गर्ने छन् ।

प्रत्येक खेलमा उत्कृट क्याच गर्ने खेलाडिलाई सुविसु किलियर टिभि किलियर र प्रत्येक खेलमा सवै भन्दा छिटो अर्धसतक प्रहार गर्ने खेलाडीलाई सुविसु फास्टेस फिप्टि प्रदान गरिने जनाएको छ । जुन १ वर्षको लागी निशुल्क सुविसु केवलनेट प्रा.लिले इन्टर नेट र किलियर टिभि उपलब्ध गराउनेछ ।

उद्धघाटन खेल मंसिर २८ मा शरद भेषावकर कप्तान रहेको पोखरा पल्टन र ज्ञानेन्द्र मल्ल कप्तान रहेको काठमाडौं गोल्डेन्सबीच प्रतिस्पर्धा हुने छ । पीपीएलमा कुल १७ खेल हुने छन् । लिग चरण पछि शीर्ष टोली स्वतः फाइनलमा पुग्ने छ । दोस्रो र तेस्रो स्थानमा रहने टोलीले फाइनल प्रवेशका लागि एलिमिनेटर खेल्नु पर्ने समिकरण छ । पुछारमा रहने तीन टोली लिग चरणबाटै बाहिरने छन् । फाइनल पुष १२ गते हुने छ ।