काठमाडौं (हाम्रो खेलकुद) – काठमाडौं गोल्डेन्सले दोस्रो संस्करणको नमस्ते पोखरा प्रिमियर लिग (पीपीएल) मा तीनै जना भारतीय खेलाडी भित्र्याएको छ ।

नेपाली घरेलु फ्रेन्चाइज लिगमा उत्कृष्ट प्रर्दशन गर्दै आएका विश्फोटक ब्याट्सम्यान गौरव तोमर, बायाँ हाते विकेटकीपर जयकिशन कोल्सावाला र अलराउन्डर सुवोध भाटीले काठमाडौंबाट खेल्ने भएका छन् । गत पुषमा तेस्रो संस्करणको एभरेष्ट प्रिमियर लिग (इपीएल) ज्ञानेन्द्र मल्ल कप्तान रहेको ललितपुर प्याट्रियटर्सले जित्दा जयकिशन र तोमरको प्रर्दशन उत्कृष्ट थियो ।

पीपीएलमा गौरवले हुलास काठमाडौं रोयल्सबाट ६ खेलमा २ सय १२ रन बनाउँदै उत्कृष्ट ब्याट्सम्यान घोषित भएका थिए । जसमा १६ चौका र १४ छक्का सामेल थियो । उनी पीपीएलमा सर्वाधिक छक्का प्रहार गर्ने खेलाडी बनेका थिए । कोल्सावालले पनि पीपीएल काठमाडौंबाटनै ६ खेलमा १ सय १९ रन जोडेका थिए ।

सुवोध दिल्लीबाट रणजी ट्रफि खेलि सकेका तीब्र गतिका बलिङ अलराउन्डर हुन् । तल्लोक्रममा ठूला सट खेल्ने गर्दछन् । सुवोधले दोस्रो संस्करणको डीपीएलमा काठमाडौंबाटै १ सय १६ रन बनाउनुको साथै ८ विकेट लिएका थिए । दिल्लीबाट निरन्तर घरेलु लिग खेल्दै आएका सुबोधले ६ प्रथम श्रेणी, २४ लिष्ट ए र ३९ टि ट्वान्टी एस खेलेका छन् ।

गत वर्ष ललितपुरलाई इपीएलको च्याम्पियन बनाउन गौरभले ७ खेलमा २ सय २९ रन बनाएका थिए । कोल्सावालाले ७ खेलमा १ सय ८८ रन जोडेका थिए । डीपीएलमा कोल्सावालले ७ खेलमा १ सय ५९ रन बनाउँदै सिवाइसी अत्तरियालाई उपाधि सहज बनाएका थिए ।

तोमरले काठमाडौंबाट खेल्दै उत्कृष्ट प्रर्दशन गरेका थिए । यी तीनै खेलाडीको प्रर्दशन नेपाली घरेलु लिगमा उच्च रहँदै आएको छ । गत वर्ष हुलास रोयल्स काठमाडौंको स्थानमा काठमाडौं गोल्डेन्स आएको हो । काठमाडौंले मंसिर २८ मा पोखरा पल्टनसँग खेल्दै पीपीएलको सुरुवात गर्ने छ । पीपीएल मंसिर २८ देखी पुष १२ सम्म चल्ने छ ।

काठमाडौं गोल्डेन्सको टोली:

ज्ञानेन्द्र मल्ल (कप्तान), पवन सरार्फ, सुसन भारी, पृथु बास्कोटा, अमर सिंह राउटेला, आदिल खान, नन्दन यादव, बसन्त रेग्मी, अमित श्रेष्ठ, सुवास खकुरेल र अमृत भट्टाई ।

विदेशी खेलाडी:

गौरव तोमर, जयकिशन कोल्सावाला र सुवोध भाटी (तीनै जना भारतीय)